તારી પત્નીએ મારી પત્ની સાથે ઝઘડો કેમ કર્યો તેમ કહી તેની સાથેના અન્ય બે શખ્સો સાથે મળી છરીથી જીવલેણ હુમલો કર્યો

મવડી વિસ્તારના કુખ્યાત શખ્સોએ જાહેરમાં આતંક મચાવી છરી વડે જીવલેણ હુમલો કર્યો હતો. દારુ સહિતના અનેક ગુન્હામાં સંડોવાયેલા કરણ બોરીચા પર કુખ્યાત વિપુલ બગથરીયા અને તેની સાથેના બે શખ્સોએ જુની અદાવતનો ખાર રાખી છરી વડે હુમલો કરી હત્યાનો પ્રયાસ કરતા માલવીયાનગર પોલીસ મથકમાં હત્યાના પ્રયાસની કલમ હેઠળ ગુન્હો નોંધાયો હતો.
બનાવ અંગે નાનામૌવા મેઈનરોડ પર માલધારી ચોક પાસે નહેરુનગર શેરી નં.4માં રહેતા કરણ જીલુભાઈ કુંભારવાડીયા (ઉ.24) એ નોંધાવેલ ફરિયાદમાં આરોપી તરીકે વિપુલ પ્રવિણ બગથરીયા, મીત ઉર્ફે ભાજી રાજુ ખગરામ અને અભિષેક ઉર્ફે અભલો બાડોનું નામ આપતા માલવીયાનગર પોલીસે હત્યાના પ્રયાસ સહિતની કલમ હેઠળ ગુન્હો નોંધી તપાસ હાથ ધરી હતી.
વધુમાં ફરિયાદીએ જણાવ્યું હતું કે તે કોલેજમાં બીકોમનો અભ્યાસ કરે છે અને વધારાના સમયમાં મજુરીકામ કરે છે. ગઈકાલે રાત્રીના સાડા અગિયારેક વાગ્યાના આસપાસ તેમનો મિત્ર આફતાબ જુણેજા તેમના ઘરે આવેલ અને જમીને બંને ખીજડાવાડા મેઈન રોડ પર આવેલ પાનના ગલ્લે ફાકી ખાવા ગયેલા ત્યાં ઉભા હતા ત્યારે તેનો અગાઉનો મિત્ર વિપુલની પત્ની તેમના ઘરે આવી તેની પત્નીને ગાળો આપેલ અને તે સમયે બોલાચાલી થયેલ હતી. જે બનાવ એક માસ પહેલા થયેલ હોય તેમનું ખાર રાખી વિપુલ બગથરીયા, તેના મિત્ર મિત ઉર્ફે ભાજી અને અભિષેક ઉર્ફે અભલો ધસી આવેલ અને વિપુલે કહેલ કે તારી પત્નીએ મારી પત્ની સાથે અગાઉ ઝઘડો કરેલ છે
જેથી તને આજે પતાવી દેવો છે તેમ કહી ત્રણેય શખ્સો ગાળો આપવા લાગેલ જેથી તેમની સાથે રહેલો તેમનો પુત્ર આફતાબને ભય લાગતા તે ભાગી ગયો હતો.
દરમ્યાન વિપુલે હાથમાં પહેરેલ કડાથી મુકકો મારેલ અને તેને સમજાવવા જતા ત્રણેય શખ્સો ઉશ્કેરાઈ જઈ તેમની પાસે રહેલ છરીથી આડેધડ માથાના ભાગે ઘા ઝીંકવા લાગેલ ત્યારે અભિષેક વાળાએ તેમને પકડી રાખેલ હતો અને ત્રણેય શખ્સોએ કહેલ કે આજે તો તને પતાવી દેવો છે તેમ જાનથી મારી નાખવાની ધમકી આપેલ અને છરી વડે જીવલેણ હુમલો કરી ઢીકાપાટુનો માર મારી નાસી છુટયા હતા. બાદમાં તે બેભાન થઈ ઢળી પડયો હતો અને માથાના ભાગેથી લોહી નીકળવા લાગ્યુ હતું.
બાદમાં લોકોએ તેને 108 મારફતે સારવારમાં સીવીલ હોસ્પીટલમાં ખસેડેલ હતા.બનાવ અંગેની ફરિયાદ પરથી માલવીયાનગર પોલીસે ગુન્હો નોંધી પીઆઈ જે.આર.દેસાઈ અને ટીમે આરોપીની શોધખોળ હાથ ધરી છે.

આ પ્રકારના તમામ સમાચાર માટેે App ડાઉનલોડ કરો.