પાકિસ્તાનના પૂર્વ મંત્રીએ કેજરીવાલનો ફોટો પોસ્ટ કર્યો:લખ્યું- નફરતની હાર થશે, દિલ્હીના CMનો વળતો જવાબ- તમે પહેલા તમારા દેશનું ધ્યાન રાખો

લોકસભા ચૂંટણીના છઠ્ઠા તબક્કાના મતદાન દરમિયાન દિલ્હી CM અરવિંદ કેજરીવાલે શનિવારે સવારે પોતાના પરિવાર સાથે દિલ્હીમાં મતદાન કર્યું, જેની તસવીર તેમણે સોશિયલ મીડિયા પર પોસ્ટ કરી હતી. કેજરીવાલની તસવીરને ફરીથી પોસ્ટ કરતા પાકિસ્તાનના પૂર્વ મંત્રી ફવાદ ચૌધરીએ લખ્યું- હું પ્રાર્થના કરું છું કે શાંતિ અને સદભાવ થકી નફરત અને ઉગ્રવાદની તાકાતનો પરાજય થશે. ફવાદ ચૌધરીને વળતો જવાબ આપતાં કેજરીવાલે કહ્યું- ચૌધરીસાહેબ, હું અને મારા દેશના લોકો તેમના મુદ્દાઓને સંભાળવા માટે સંપૂર્ણ રીતે સક્ષમ છે. તમારા ટ્વીટની જરૂર નથી. હાલમાં પાકિસ્તાનની સ્થિતિ ખૂબ જ ખરાબ છે. તમે તમારા દેશનું ધ્યાન રાખો. ભારતમાં જે ચૂંટણી થઈ રહી છે એ અમારી આંતરિક બાબત છે. ભારત આતંકવાદના સૌથી મોટા સહાયકની દખલગીરી સહન કરશે નહીં. કેજરીવાલે જવાબ આપ્યાના 17 મિનિટ બાદ ફવાદ ચૌધરીએ ફરી એક પોસ્ટ કરી, જેમાં લખ્યું- સીએમ સાહેબ! ચૂંટણીપ્રચાર તમારો પોતાનો મુદ્દો છે, પરંતુ હું ઈચ્છું છું કે તમે ઉગ્રવાદના મુદ્દાનો ઉલ્લેખ કરો. પાકિસ્તાન હોય કે ભારત, આ એક એવો મુદ્દો છે જે બધા માટે ખતરનાક છે. દરેક વ્યક્તિએ આ મુદ્દાની ચિંતા કરવી જોઈએ. પાકિસ્તાનની સ્થિતિ ખૂબ જ ખરાબ છે, પરંતુ લોકોએ એક સારા સમાજનું નિર્માણ કરવાનો પ્રયાસ કરવો જોઈએ. બીજી તરફ, દિલ્હી બીજેપીના પ્રદેશ અધ્યક્ષ વીરેન્દ્ર સચદેવાએ કહ્યું- પાકિસ્તાન વિદેશી ફંડિંગ લઈ રહેલા અરવિંદ કેજરીવાલને સમર્થન આપી રહ્યું છે, આ કોઈ સંયોગ નથી કે દિલ્હીમાં ચૂંટણીના દિવસે જ પાકિસ્તાન તરફથી કેજરીવાલના સમર્થનમાં નિવેદન આવી રહ્યું છે. કેજરીવાલ દેશના દુશ્મનો સાથે મિલીભગતમાં છે અને દેશની સુરક્ષા માટે મોટું જોખમ બની ગયા છે. દેશ અને દિલ્હીની જનતા આ સમજી ગઈ છે. ફવાદે કહ્યું- પાકિસ્તાનની ટીકા કર્યા વિના ભારતીય નેતાઓનું ભાષણ પૂરું થતું નથી
કેજરીવાલના જવાબ બાદ ફવાદ ચૌધરીએ X પર બીજી પોસ્ટ કરી. તેમણે લખ્યું- ભારતમાં રાજનેતાઓનું ભાષણ પાકિસ્તાનની ટીકા કર્યા વિના પૂરું થતું નથી, જ્યારે પાકિસ્તાનમાં કોઈને ભારતીય રાજનીતિની ચિંતા નથી. ભાજપ મુસ્લિમવિરોધી ભાવનાઓ વ્યક્ત કરવા માટે પાકિસ્તાનનો ઉપયોગ કરે છે. કેન્દ્રીય મંત્રી રિજિજુએ કહ્યું- કેજરીવાલને પાકિસ્તાનમાં ભારે સમર્થન છે
કેન્દ્રીય મંત્રી કિરેન રિજિજુએ પણ ફવાદ ચૌધરીના નિવેદન પર પ્રતિક્રિયા આપી હતી. એક ન્યૂઝ ચેનલ સાથે વાત કરતાં તેમણે કહ્યું- માત્ર રાહુલ ગાંધી જ નહીં, પરંતુ અરવિંદ કેજરીવાલનું પણ પાકિસ્તાનમાં ભારે સમર્થન છે. આ પહેલીવાર નથી જ્યારે ફવાદે આવું નિવેદન આપ્યું હોય. થોડા સમય પહેલાં તેમણે રાહુલ ગાંધીનો એક વીડિયો પણ શેર કર્યો હતો. ફવાદે રાહુલના સમર્થનમાં પણ પોસ્ટ કરી હતી
ફવાદ ચૌધરીએ 1 મેના રોજ 'રાહુલ ઓન ફાયર' ટ્વીટ કર્યું હતું. આ ટ્વીટની સાથે તેમણે કોંગ્રેસનેતા રાહુલ ગાંધીનો એક વીડિયો પણ પોસ્ટ કર્યો હતો. આ વીડિયોમાં રાહુલ ગરીબો, ખેડૂતો અને બેરોજગાર યુવાનોની વાત કરી રહ્યા છે. ફવાદની પોસ્ટ બાદ ભાજપના નેતાઓએ કોંગ્રેસને પાકિસ્તાન સમર્થક ગણાવી હતી. બીજેપી નેતા શહેઝાદ પૂનાવાલાએ કહ્યું- અગાઉ હાફિઝ સઈદે કહ્યું હતું કે કોંગ્રેસ તેમની ફેવરિટ પાર્ટી છે. મણિશંકર ઐયર પીએમ મોદીને હટાવવા માટે સમર્થન મેળવવા પાકિસ્તાન ગયા હતા. અમને યાદ છે કે તાજેતરમાં કોંગ્રેસના નેતાઓએ પાકિસ્તાન ઝિંદાબાદના નારા લગાવ્યા હતા. શહેઝાદ પૂનાવાલાએ કહ્યું હતું કે ફવાદ ચૌધરીની પોસ્ટથી સ્પષ્ટ થઈ ગયું છે કે કોંગ્રેસનો હાથ પાકિસ્તાન સાથે છે. મુસ્લિમ લીગના મેનિફેસ્ટોથી લઈને મુસ્લિમ લીગની રચના સુધીનું પાકિસ્તાનનું નિવેદન ભારતીય ગઠબંધનના નિવેદનના એક દિવસ બાદ આવ્યું છે, જેમાં તેમણે કહ્યું છે કે ચાલો 'વોટ જેહાદ' કરીએ.

આ પ્રકારના તમામ સમાચાર માટેે App ડાઉનલોડ કરો.