યુપીમાં એન્કાઉન્ટરમાં 3 ખાલિસ્તાની આતંકવાદીઓ ઠાર:પીલીભીતમાં STF અને પંજાબ પોલીસનું ઓપરેશન, ગુરદાસપુરમાં પોલીસ ચોકી પર ગ્રેનેડ હુમલો કર્યો હતો
યુપીના પીલીભીતમાં એન્કાઉન્ટરમાં 3 ખાલિસ્તાની આતંકવાદીઓ માર્યા ગયા છે. STF અને પંજાબ પોલીસે સોમવારે વહેલી સવારે આ ઓપરેશન હાથ ધર્યું હતું. માર્યા ગયેલા તમામ આતંકીઓ ખાલિસ્તાની કમાન્ડો ફોર્સના હોવાનું કહેવાય છે. તેમણે પંજાબના ગુરદાસપુર જિલ્લામાં પોલીસ ચોકી પર ગ્રેનેડ હુમલો કર્યો હતો. માર્યા ગયેલા આતંકવાદીઓ પાસેથી બે એકે-47 રાઈફલ, બે ગ્લોક પિસ્તોલ અને મોટી માત્રામાં કારતૂસ મળી આવ્યાં છે. આ એન્કાઉન્ટર પીલીભીતના પુરનપુર કોતવાલી વિસ્તારમાં થયું હતું. માર્યા ગયેલા આતંકવાદીઓ ગુરદાસપુરના રહેવાસી ગુરવિંદર સિંહ, વીરેન્દ્ર સિંહ ઉર્ફે રવિ અને જસપ્રીત સિંહ ઉર્ફે પ્રતાપ સિંહ છે. એન્કાઉન્ટરમાં ગોળી વાગ્યા બાદ તમામને પુરનપુર સીએચસીમાં લાવવામાં આવ્યા હતા. ત્યાં તબીબોએ તમામને મૃત જાહેર કર્યા હતા. જ્યારે આતંકવાદીઓ ઘેરાઈ ગયા ત્યારે તેમણે પોલીસ પર ગોળીબાર કર્યોઃ SP પીલીભીતના SP અવિનાશ પાંડેએ કહ્યું- સોમવારે સવારે પંજાબની ગુરદાસપુર પોલીસની ટીમ પુરનપુર પોલીસ સ્ટેશન પહોંચી હતી. જાણકારી મુજબ થોડા દિવસો પહેલા ગુરદાસપુરમાં બક્ષીવાલ પોલીસ ચોકી પર ખાલિસ્તાની આતંકવાદીઓએ ગ્રેનેડ હુમલો કર્યો હતો. તેઓ પુરનપુર વિસ્તારમાં છુપાયા હોવાની માહિતી મળી હતી. સમગ્ર જિલ્લામાં તાત્કાલિક નાકાબંધી કરી દેવામાં આવી હતી. ચેકિંગ શરૂ કરાયું હતું. આ દરમિયાન ખબરિયા પોઈન્ટ પર તહેનાત પોલીસે માહિતી આપી હતી કે એક બાઇક પર ત્રણ શકમંદો જોવા મળ્યા હતા. તેમની પાસે કેટલીક શંકાસ્પદ વસ્તુઓ છે. તે બાઇક પર પીલીભીત તરફ ગયા હતા. પંજાબ પોલીસ અને પુરનપુર પોલીસે તેમનો પીછો કર્યો હતો. આગળના પોલીસ સ્ટેશનોને એલર્ટ કરવામાં આવ્યા હતા.
જ્યારે પોલીસે પુરનપુર અને પીલીભીત વચ્ચે નિર્માણાધીન પુલ પર આ લોકોને ઘેરી લીધા તો તેઓ એક ટ્રેક તરફ વળ્યા. આ પછી, જ્યારે અમે તેમને રોકવા માટે કહ્યું, તો તેઓએ પોલીસ ટીમ પર અંધાધૂંધ ગોળીબાર શરૂ કર્યો. જવાબી કાર્યવાહીમાં ત્રણેય આતંકીઓને ઠાર કરવામાં આવ્યા હતા. હોસ્પિટલમાં તેમનું મૃત્યુ થયું હતું. પંજાબ પોલીસે કહ્યું કે આ આતંકવાદીઓનું વિદેશી કનેક્શન પણ છે. આરોપી પાસેથી ચોરીની બાઈક મળી આવી છે. તે પુરનપુર પોલીસ સ્ટેશન વિસ્તારમાંથી ચોરાઈ હતી. આતંકીઓના ગોળીબારમાં બે પોલીસ કોન્સ્ટેબલ પણ ઘાયલ થયા છે. આતંકવાદીઓએ 30 મિનિટમાં 100 રાઉન્ડ ફાયરિંગ કર્યું હતું એન્કાઉન્ટર ટીમના એક અધિકારીએ ભાસ્કરને જણાવ્યું - આતંકવાદીઓ પાસે AK-47 હતી. પંજાબ પોલીસને પહેલેથી જ અંદાજ હતો કે આતંકીઓ પાસે મોટા હથિયારો છે. તેથી, પીલીભીત પોલીસના એસપી અવિનાશ પાંડેએ જવાનોને લાંબા અંતરના હથિયારો સાથે લીધા હતા.પોલીસને ઘેરાયેલી જોઈને આતંકવાદીઓએ પોલીસ પર ગ્રેનેડ ફેંક્યા હતા. જો કે, પીલીભીત પોલીસની ગાડી પર તે વિસ્ફોટ થયો ન હતો, અન્યથા મોટી ઘટના બની શકી હોત. લગભગ અડધા કલાકમાં પોલીસ અને આતંકવાદીઓ વચ્ચે 100 રાઉન્ડથી વધુ ફાયરિંગ કરવામાં આવ્યું હતું. મોટા ભાગનું ફાયરિંગ આતંકવાદીઓએ કર્યું હતું. પંજાબના ગુરુદાસપુરમાં ચોકી અને પોલીસ સ્ટેશન પર હુમલો થયો હતો... 19 ડિસેમ્બરે ચોકી પર હુમલો, ખાલિસ્તાન ઝિંદાબાદ ફોર્સે જવાબદારી લીધી હતી 19 ડિસેમ્બરે પંજાબની ભારત-પાકિસ્તાન સરહદ નજીક આવેલા ગુરદાસપુર જિલ્લાની પોલીસ ચોકી પર આતંકવાદી હુમલો થયો હતો. પોલીસ દ્વારા જપ્ત કરાયેલી ઓટો પર આતંકવાદીઓએ ગ્રેનેડ ફેંક્યો હતો. બક્ષીવાલ ચોકી જ્યાં બ્લાસ્ટ થયો હતો તે કલાનૌર શહેરમાં છે અને લગભગ એક મહિના પહેલાં તેને બંધ કરી દેવામાં આવી હતી. બ્લાસ્ટ બાદ પોલીસ અધિકારીઓ ઘટનાસ્થળે પહોંચી ગયા હતા. બોમ્બ ડિસ્પોઝલ સ્ક્વોડ અને ફોરેન્સિક નિષ્ણાતોએ સેમ્પલ લીધાં હતાં. 21 ડિસેમ્બરે ગુરુદાસપુરના પોલીસ સ્ટેશન પર ગ્રેનેડ હુમલો, BKIએ જવાબદારી લીધી 21 ડિસેમ્બરે પંજાબના ગુરદાસપુર જિલ્લાના બંગા વડાલા ગામના પોલીસ સ્ટેશન પર ગ્રેનેડ હુમલો કરવામાં આવ્યો હતો. મળતી માહિતી મુજબ બંગા વડાલા ગામ રાત્રે બ્લાસ્ટથી હચમચી ગયું હતું. જ્યારે લોકો ડરીને ઘરની બહાર નીકળ્યા ત્યારે તેમને ખબર પડી કે પોલીસ સ્ટેશન પર ગ્રેનેડ હુમલો કરવામાં આવ્યો છે. ખાલિસ્તાન સમર્થક સંગઠન બબ્બર ખાલસા ઈન્ટરનેશનલ (BKI)એ આ હુમલાની જવાબદારી લીધી હતી. ગુરદાસપુરના કલાનૌર વિસ્તારમાં છેલ્લા 48 કલાકમાં આ બીજો ગ્રેનેડ હુમલો છે. પંજાબમાં 28 દિવસમાં 8 વખત ગ્રેનેડ હુમલા કરવામાં આવ્યા છે. વધતી જતી ઘટનાઓને કારણે રાજ્યની સુરક્ષા, કાયદો અને વ્યવસ્થા પર ગંભીર સવાલો ઊભા થયા છે.
આ પ્રકારના તમામ સમાચાર માટેે
App ડાઉનલોડ કરો.