રાજસ્થાનથી આવેલા દારૂના જથ્થા સાથે બે શખ્સો ઝડપાયા

દિવાળી પૂર્વે શહેરમાં દારૂની રેલમછેલ થાય તે પહેલા જ ક્રાઈમ બ્રાંચ ત્રાટકી હતી અને રાજસ્થાન આવેલા દારૂના જથ્થા સાથે રાજસ્થાની બુટલેગર અને રીક્ષાચાલકને દબોચી દારૂની 576 બોટલ સહીત રૂા.2.53 લાખનો મુદામાલ કબ્જે કર્યો હતો. જયારે રીસીવર સાજીદ નામના શખ્સની શોધખોળ હાથ ધરી હતી.
દરોડાની વિગત મુજબ ક્રાઈમ બ્રાંચ પીઆઈ એમ.આર. ગોંડલીયા, એમ.એલ. ડામોરની રાહબરીમાં પીએસઆઈ એ.એન. પરમાર ટીમ સાથે પેટ્રોલીંગમાં હતા ત્યારે સાથેના એએસઆઈ હરદેવસિંહ જાડેજા, કોન્સ. ગોપાલ પાટીલ, અર્જુન ડવ સહીતના સ્ટાફને જામનગર રોડ, રૂડા ઓફીસની સામેથી દારૂ ભરેલ એક રીક્ષા પસાર થવાની હોવાની મળેલ ચોકકસ બાતમીના આધારે સ્ટાફ વોચમાં હતો.
ત્યારે ત્યાંથી પસાર થયેલ રીક્ષા નં. જીજે 03 બીએકસ 3865ને અટકાવી તેમાં રાખેલ પાર્સલ ખોલી ચેક કરતા તેમાંથી દારૂની 576 બોટલ મળી આવતા રીક્ષાચાલક દિનેશ વિજય ગોસ્વામી (ઉ.32) (રહે. જય જવાન, જયકિશાન સોસાયટી શેરી નં.4) અને તેની સાથે રહેલ જીતેન્દ્ર દેવીલાલ પાલીવાલ (ઉ.31) (રહે. નાથદ્વારા, રાજસ્થાન)ને પકડી પાડી દારૂ અને રીક્ષા મળી કુલ રૂા.2.53 લાખનો મુદામાલ કબ્જે કર્યો હતો.
વધુમાં પોલીસ સુત્રોએ જણાવ્યું હતું કે રાજસ્થાની, જીતેન્દ્ર રાજસ્થાનથી દારૂ ખાનગી વાહનમાં લઈ આવી ગ્રીનલેન્ડ ચોકડી પાસે દિનેશ ગોસ્વામીની રીક્ષા ભાડે કરી જામનગર રોડ પર પરસાણાનગરમાં રહેતા સાજીદ અલ્લારખા લેજાને સપ્લાય કરવા જનાર હોવાની બન્ને શખ્સોએ કબુલાત આપતા રીસીવર સાજીદની શોધખોળ હાથ ધરી હતી. ઉલ્લેખનીય છે કે રાજસ્થાની જીતેન્દ્ર પાલીવાલ વિરૂધ્ધ દારૂના અનેક ગુના નોંધાયેલ છે. તેમજ રીક્ષા ચાલક પણ દારૂની ખેંપ મારતા અગાઉ પકડાઈ ચુકયો છે.

આ પ્રકારના તમામ સમાચાર માટેે App ડાઉનલોડ કરો.