મોદીજી, તમારા નેતાઓ પર લગામ લગાવો:રાહુલને મારવાની ધમકી આપે છે; રાહુલ વિરુદ્ધ હેટ સ્પીચ મુદ્દે ખડગેનો PMને પત્ર

કોંગ્રેસ-અધ્યક્ષ મલ્લિકાર્જુન ખડગેએ વડાપ્રધાન નરેન્દ્ર મોદીને તેમના 74મા જન્મદિવસની શુભેચ્છા પાઠવી છે. ખડગેએ PMને પત્ર પણ લખ્યો છે, જેમાં રાહુલ ગાંધી વિરુદ્ધ નફરતભર્યા ભાષણ પર ચિંતા વ્યક્ત કરી છે. ખડગેએ કહ્યું- 'ભાજપ અને સહયોગી પક્ષોના નેતાઓ દ્વારા રાહુલ ગાંધી વિરુદ્ધ ખૂબ જ વાંધાજનક અને હિંસક ભાષાનો સતત ઉપયોગ કરવામાં આવી રહ્યો છે. આપને વિનંતી છે કે આવા નેતાઓ પર લગામ લગાવો.' હકીકતમાં ગયા અઠવાડિયે ભાજપના એક નેતા, એક કેન્દ્રીય મંત્રી અને શિવસેનાના એક ધારાસભ્યએ રાહુલ ગાંધી વિરુદ્ધ નિવેદનો આપ્યાં હતાં. એને રાજકીય પતન ગણાવીને ખડગેએ PM પાસે કડક કાર્યવાહીની માગ કરી છે. રાહુલ વિરુદ્ધ ભાજપ અને તેના સહયોગી પક્ષોના નેતાઓનાં 3 નિવેદન... 1. તરવિંદર સિંહ મારવાહઃ BJPએ 11 સપ્ટેમ્બરે દિલ્હીમાં રાહુલ ગાંધીના ઘરની બહાર પ્રદર્શન કર્યું હતું. આ દરમિયાન BJP નેતા તરવિંદર સિંહ મારવાહ પર રાહુલને જાનથી મારી નાખવાની ધમકી આપવાનો આરોપ લાગ્યો હતો. કોંગ્રેસે સોશિયલ મીડિયા પ્લેટફોર્મ પર લખ્યું- આ બહુ ગંભીર બાબત છે. આ ભાજપની નફરતની ફેક્ટરીની ઊપજ છે. આ અંગે પગલાં લેવા જોઈએ. PM મોદી તેમની પાર્ટીના આ નેતાની ધમકી પર ચૂપ રહી શકતા નથી. 'રાહુલ ગાંધી, થોભી જાઓ, નહીં તો ભવિષ્યમાં તમે પણ તમારી દાદી જેવી જ સ્થિતિનો સામનો કરશો.- તરવિંદર સિંહ, ભાજપ નેતા 2. કેન્દ્રીય મંત્રી રવનીત સિંહ બિટ્ટુઃ કેન્દ્રીય મંત્રી અને ભાજપનેતા રવનીત સિંહ બિટ્ટુએ 15 સપ્ટેમ્બરે કોંગ્રેસનેતા રાહુલ ગાંધીને આતંકવાદી કહ્યા હતા. તેમણે કહ્યું હતું કે રાહુલ ગાંધી ભારતીય નથી. તેઓ ભારતને પ્રેમ પણ નથી કરતા. રાહુલે પહેલા મુસલમાનોનો ઉપયોગ કરવાનો પ્રયાસ કર્યો, પરંતુ જ્યારે એમ ન થયું ત્યારે હવે તેઓ શીખોમાં ભાગલા પાડવાનો પ્રયાસ કરી રહ્યા છે. કેન્દ્રીય મંત્રીએ કહ્યું, 'રાહુલ ગાંધી દેશના નંબર વન આતંકવાદી છે. જે પણ તેમને પકડે છે તેને ઈનામ મળવું જોઈએ, કારણ કે તેઓ દેશના સૌથી મોટા દુશ્મન છે. દેશની એજન્સીઓએ તેમના પર નજર રાખવી જોઈએ. હકીકતમાં રાહુલ ગાંધીએ અમેરિકામાં કહ્યું હતું કે ભારતમાં શીખ સમુદાયમાં ચિંતા છે કે શું તેમને પાઘડી અને કડા પહેરવાની મંજૂરી આપવામાં આવશે કે નહીં. કોંગ્રેસનો જવાબઃ કેન્દ્રીય મંત્રીના નિવેદન પર પાર્ટીના પ્રવક્તા સુપ્રિયા શ્રીનેતે કહ્યું હતું કે જેણે રાહુલ ગાંધીની સામે જઈને પોતાની રાજકીય કારકિર્દી બનાવી છે તે સત્તાના લોભમાં વિરોધીઓના ખોળામાં બેસીને સસ્તાં નિવેદનો આપી રહ્યાં છે. રવનીત બિટ્ટુને શાસ્ત્રોમાં આસ્તીનના સાપ કહેવામાં આવ્યા છે. 3. સંજય ગાયકવાડઃ 16 સપ્ટેમ્બરે મહારાષ્ટ્રના બુલઢાણાના ધારાસભ્ય સંજય ગાયકવાડે કહ્યું હતું કે 'રાહુલ ગાંધી પછાત વર્ગો અને આદિવાસીઓનું આરક્ષણ ખતમ કરવા માગે છે. આ માટે તેમને ઈનામ આપવામાં આવશે, જે કોઈ રાહુલની જીભ કાપશે તેને 11 લાખ રૂપિયા આપવામાં આવશે. સંજયે એમ પણ કહ્યું હતું કે કોંગ્રેસે લોકસભાની ચૂંટણીમાં બંધારણ ખતરામાં હોવાનું નકલી નિવેદન કરીને મત મેળવ્યા હતા. આજે તેઓ અનામત ખતમ કરવાની વાત કરી રહ્યા છે. કોંગ્રેસ પછાત વર્ગો, ઓબીસી અને આદિવાસીઓનું અનામત ખતમ કરવા માગે છે. સંજય વિરુદ્ધ બુલઢાણામાં FIR નોંધવામાં આવી છે. રાહુલ ગાંધીના શીખ નિવેદન પર હોબાળો
રાહુલ ગાંધી તાજેતરમાં અમેરિકાના પ્રવાસે હતા. ભારતમાં આરક્ષણ ક્યાં સુધી ચાલુ રહેશે એવા પ્રશ્નના જવાબમાં તેમણે કહ્યું હતું કે "કોંગ્રેસ ત્યારે જ અનામત ખતમ કરવાનું વિચારશે જ્યારે દેશમાં દરેકને સમાન તકો મળવા લાગશે. હાલમાં ભારતમાં આવી કોઈ સ્થિતિ નથી." તેમણે એમ પણ કહ્યું હતું કે ભારતમાં શીખ સમુદાયમાં ચિંતા છે કે શું તેમને પાઘડી અને કડા પહેરવાની મંજૂરી આપવામાં આવશે કે નહીં. રાહુલ ગાંધીના આ નિવેદનનો દેશભરમાં વિરોધ થયો હતો. જોકે રાહુલ ગાંધીએ કહ્યું હતું કે તેમના નિવેદનનું ખોટું અર્થઘટન કરવામાં આવ્યું છે. આ સમાચાર પણ વાંચો... 'રાહુલ ગાંધી દેશના નંબર-1 આતંકવાદી':રવનીત સિંહે કહ્યું- જે કોઈ રાહુલને પકડે તો તેને ઈનામ મળવું જોઈએ; ધનખડ બોલ્યા- તેમની માનસિકતા બંધારણવિરોધી છે. મુંબઈમાં એક કાર્યક્રમ દરમિયાન ઉપાધ્યક્ષ જગદીપ ધનખડે પણ રાહુલ પર નિશાન સાધ્યું હતું. તેમણે કહ્યું હતું કે અનામત ખતમ કરવા અંગે બંધારણીય પદ પર રહેલી વ્યક્તિની ટિપ્પણી બંધારણવિરોધી માનસિકતા દર્શાવે છે. અનામત યોગ્યતા વિરુદ્ધ નથી, પરંતુ તે દેશ અને બંધારણના આત્મા છે. આ હકારાત્મક વિચારસરણી છે, નકારાત્મક નથી. તે કોઈને તકોથી વંચિત નથી કરી રહ્યા, પરંતુ સમાજને એક મજબૂત સ્તંભ તરીકે સમર્થન આપી રહ્યા છે. સંપૂર્ણ સમાચાર વાંચવા માટે અહીં ક્લિક કરો...

આ પ્રકારના તમામ સમાચાર માટેે App ડાઉનલોડ કરો.