દાવો- હમાસ ચીફને મારવા બદલ નેતન્યાહુથી નારાજ બાઈડન:ફોન પર ઠપકો આપ્યો અને કહ્યું- બકવાસ ન કરો; ઈરાને કહ્યું- યોગ્ય સમયે હુમલો કરીશું

ઈરાનમાં હમાસ ચીફ ઈસ્માઈલ હાનિયાના મોત બાદ ઇઝરાયલના વડાપ્રધાન બેન્જામિન નેતન્યાહુ અને અમેરિકાના રાષ્ટ્રપતિ જો બાઈડન વચ્ચે ઉગ્ર ચર્ચા થઈ હતી. હાનિયાની હત્યા બાદ ગુરુવારે બંને નેતાઓ વચ્ચે ટેલિફોન પર વાતચીત થઈ હતી. ટાઈમ્સ ઓફ ઇઝરાયલ અનુસાર, આ દરમિયાન બાઈડને નેતન્યાહુને કહ્યું, "મારી સાથે બકવાસ વાતો ન કરો." અમેરિકાના રાષ્ટ્રપતિએ નેતન્યાહુને હાનિયાની હત્યાના સમય અંગે સવાલ કર્યા હતા. તેમણે કહ્યું કે આનાથી યુદ્ધવિરામના પ્રયાસોને મોટો ફટકો લાગ્યો છે. નેતન્યાહુએ બાઈડનના તમામ આરોપોને ફગાવી દીધા હતા. બાઈડને નેતન્યાહુને કહ્યું કે અમેરિકાના રાષ્ટ્રપતિના મહત્વને ઓછું ન આંકવું. અહેવાલો અનુસાર, ઇઝરાયલે ઇરાનમાં હાનિયાને મારવાની યોજના અંગે અમેરિકાને માહિતી આપી ન હતી. ઈરાનના ઈસ્લામિક રિવોલ્યુશનરી ગાર્ડ કોર્પ્સ (IRGC)એ શનિવારે સાંજે કહ્યું કે હમાસના ચીફ હાનિયાને શોર્ટ રેન્જની મિસાઈલ ફાયર કરીને માર્યો ગયો. આ મિસાઈલ 7 કિલો વિસ્ફોટકથી ભરેલી હતી. ઈરાને હાનિયાના મોતને આતંકવાદી ઘટના ગણાવી છે. ઈરાનનો આરોપ- અમેરિકાએ ઇઝરાયલનું સમર્થન કર્યું
IRGCના નિવેદનમાં કહેવામાં આવ્યું છે કે આ મિસાઈલ હુમલો ઇઝરાયલ દ્વારા કરવામાં આવ્યો હતો. ગુનેગાર અમેરિકન સરકારે પણ આને સમર્થન આપ્યું છે. આ આતંકવાદી કાર્યવાહી ગેસ્ટ હાઉસની બહારથી કરવામાં આવી હતી જ્યાં હાનિયા રહેતો હતો. હાનિયાના મૃત્યુના દિવસે, હમાસના પ્રવક્તા અને ડેપ્યુટી ચીફ ખલીલ અલ-હૈયાએ પણ કહ્યું હતું કે તેહરાનમાં હાનિયા જ્યાં રહેતો હતો તે ઘરને સીધા રોકેટ દ્વારા નિશાન બનાવવામાં આવ્યું હતું. જ્યારે ઘણા મીડિયા રિપોર્ટ્સમાં દાવો કરવામાં આવ્યો હતો કે હાનિયાનું મોત બોમ્બ બ્લાસ્ટમાં થયું હતું. આ બોમ્બ ઈરાનના ગેસ્ટ હાઉસમાં 2 થી 3 મહિના અગાઉથી ફીટ કરવામાં આવ્યો હતો. આમાં ઈરાની ગુપ્તચર અધિકારીઓની પણ મિલીભગત હતી. ઈરાને આ કેસમાં અત્યાર સુધીમાં 24 લોકોની ધરપકડ કરી છે. ઈરાને કહ્યું- યોગ્ય સમયે અને યોગ્ય જગ્યાએ હુમલો કરશે
ઈરાને કહ્યું છે કે શહીદ હાનિયાની હત્યાનો બદલો લેવામાં આવશે. આતંકવાદી યહૂદી શાસનને સખત સજા કરવામાં આવશે. IRGCએ કહ્યું કે અમે યોગ્ય સમયે અને સ્થળ પર બદલો લઈશું. અલ જઝીરાના જણાવ્યા અનુસાર, ઇઝરાયલે હજુ પણ આ મામલે મૌન જાળવી રાખ્યું છે. IRGCના આ નિવેદન બાદ પણ હજુ સુધી કોઈ પ્રતિક્રિયા જોવા મળી નથી. જોકે, અમેરિકાએ સ્પષ્ટતા કરી છે કે તેને ઈરાનમાં થયેલા હુમલાની કોઈ જાણકારી નથી. ઈરાનના બદલાની આશંકા વચ્ચે અમેરિકાએ મિડલ ઈસ્ટમાં યુદ્ધ જહાજો અને ફાઈટર જેટની સંખ્યામાં વધારો કરવાનું શરૂ કરી દીધું છે. દાવો- ઇઝરાયલ રઈસીના અંતિમ સંસ્કાર દરમિયાન જ હાનિયાને મારવા માંગતું હતું
બ્રિટિશ મીડિયા હાઉસ ધ ટેલિગ્રાફે પોતાના રિપોર્ટમાં દાવો કર્યો છે કે હાનિયાની હત્યા પાછળ ઇઝરાયલની ગુપ્તચર સંસ્થા મોસાદનો હાથ છે. મોસાદ ઈરાનના રાષ્ટ્રપતિ ઈબ્રાહિમ રઈસીના અંતિમ સંસ્કાર સમારોહમાં હાનિયાને મારવા માંગતો હતો. જો કે, તે સમયે ભારે ભીડને કારણે યોજના નિષ્ફળ થઈ શકી હોત, તેથી તેને મોકૂફ રાખવામાં આવી હતી.​​​​​​​ હિઝબુલ્લાએ પણ ઈઝરાયલ સામે બદલો લેવાનું વચન આપ્યું હતું
હાનિયાના મૃત્યુ બાદ સમગ્ર મિડલ ઈસ્ટમાં તણાવ વધી ગયો છે. આ દરમિયાન હિઝબુલ્લાના ચીફ હસન નસરાલ્લાહે ઈઝરાયલ સામે બદલો લેવાનું વચન આપ્યું હતું. તેમણે કહ્યું કે અત્યારે ઈઝરાયલીઓ ખૂબ ખુશ દેખાઈ રહ્યા છે, પરંતુ આવનારા દિવસોમાં તેઓ ખૂબ રડશે. નસરાલ્લાહે ઇઝરાયલ સાથે તમામ મોરચે ખુલ્લું યુદ્ધ જાહેર કર્યું. તેમણે કહ્યું કે ઈઝરાયલે રેડ લાઈન ક્રોસ કરી છે. ઇઝરાયલીઓ જાણતા નથી કે અમે આ મૃત્યુને કેવી રીતે પ્રતિસાદ આપીશું. આ પહેલા ગઈકાલે એટલે કે ગુરુવારે હાનિયાને તેહરાનમાં અંતિમ વિદાય આપવામાં આવી હતી. જેમાં હજારો લોકોએ ભાગ લીધો હતો. ઈરાનના સર્વોચ્ચ નેતા આયાતુલ્લાહ ખામેનીએ અંતિમ યાત્રાનું નેતૃત્વ કર્યું હતું. આ પછી હાનિયાના મૃતદેહને કતાર લાવવામાં આવ્યો હતો. નસરાલ્લાહની ધમકીના થોડા કલાકો પછી, હિઝબુલ્લાએ ઇઝરાયલ પર હવાઈ હુમલો કર્યો. સીએનએનના અહેવાલ મુજબ, હિઝબુલ્લાએ લેબનોનથી ઉત્તરી ઇઝરાયલ પર ડઝનેક રોકેટ ઝીંક્યા હતા. ઈઝરાયલની સેનાના જણાવ્યા અનુસાર આમાંથી માત્ર 5 રોકેટ ઇઝરાયલની સરહદમાં ઝીંક્યા છે. જો કે હુમલામાં કોઈ નુકસાનના સમાચાર નથી. આ સમાચાર પણ વાંચો... હમાસ ચીફ હાનિયાને કતારમાં દફનાવવામાં આવ્યો, શાહી કબ્રસ્તાનમાં દફનાવવામાં આવ્યો કતારની રાજધાની દોહામાં આજે હમાસ ચીફ ઈસ્માઈલ હાનિયાને અંતિમ સંસ્કાર કરવામાં આવ્યા હતા. તેમને કતારના લુસેલના રોયલ કબ્રસ્તાનમાં દફનાવવામાં આવ્યો છે. આ દરમિયાન કતાર અને પેલેસ્ટિનિયન જૂથોના હજારો નેતાઓ હાજર રહ્યા હતા. બ્રિટિશ મીડિયા મિડલ ઈસ્ટ આઈ અનુસાર, શુક્રવારે કતારની રાજધાની દોહાની સૌથી મોટી મસ્જિદમાં નમાજ અદા કરવામાં આવી હતી.

આ પ્રકારના તમામ સમાચાર માટેે App ડાઉનલોડ કરો.