‘લોરેન્સ ગેંગનો ઈરાદો મને અને મારા પરિવારને મારી નાખવાનો હતો’:પોલીસ ચાર્જશીટમાં સલમાન ખાનનું નિવેદન; કોર્ટે કહ્યું- આરોપી વિરુદ્ધ મજબૂત પુરાવા

અભિનેતા સલમાન ખાનના ગેલેક્સી એપાર્ટમેન્ટ પર ફાયરિંગ કેસમાં 22 જુલાઈએ સુનાવણી હાથ ધરવામાં આવી હતી. સ્પેશિયલ કોર્ટ મહારાષ્ટ્ર કંટ્રોલ ઓફ ઓર્ગેનાઈઝ્ડ ક્રાઈમ એક્ટ (MCOCA)ના જજ બીબી શેલ્કેએ કેસની સુનાવણી કરી હતી. પોલીસની ચાર્જશીટમાં સલમાનનું નિવેદન પણ છે. જેમાં તેણે કહ્યું હતું કે, લોરેન્સ ગેંગે તેને અને તેના પરિવારના સભ્યોની હત્યા કરવાના ઈરાદે ગોળીબાર કર્યો હતો. કેસની ચાર્જશીટ જોયા બાદ ન્યાયાધીશે કહ્યું છે કે, 'આ કેસમાં ધરપકડ કરાયેલા તમામ આરોપીઓ વિરુદ્ધ પોલીસને મજબૂત પુરાવા મળ્યા છે, જેના આધારે તેમની વિરુદ્ધ કાર્યવાહી થઈ શકે છે.' પોલીસને આપેલા પોતાના નિવેદનમાં સલમાને કહ્યું છે કે, '14 એપ્રિલની સવારે ગેલેક્સી એપાર્ટમેન્ટમાં પોતાના ઘરે સૂતો હતો ત્યારે તેણે ફટાકડા જેવો અવાજ સાંભળ્યો. પોલીસ સુરક્ષાએ સવારે લગભગ 4.55 વાગ્યે જાણ કરી હતી કે બાઇક પર સવાર બે લોકોએ પહેલા માળની બાલ્કનીમાં ગોળીબાર કર્યો હતો.' સલમાને વધુમાં કહ્યું હતું કે,આ પહેલા પણ તેને અને તેના પરિવારને નુકસાન પહોંચાડવાના પ્રયાસો કરવામાં આવ્યા હતા. લોરેન્સ અને તેની ગેંગે અગાઉ પણ સલમાન અને તેના પરિવારને ધમકી આપી હતી. પીટીઆઈના અહેવાલ મુજબ, કોર્ટે કહ્યું કે પાંચ આરોપીઓ વિરુદ્ધ આઈપીસીની કલમ 307 (હત્યાનો પ્રયાસ), 34 (સામાન્ય હેતુ), 120 (બી) હેઠળ કાર્યવાહી ચાલુ રહેશે. આ ઉપરાંત આરોપીઓ પર MCOCA અને આર્મ્સ એક્ટની કલમો પણ લગાવવામાં આવશે. મકોકા કોર્ટમાં 1736 પાનાની ચાર્જશીટ દાખલ કરવામાં આવી હતી
નવી મુંબઈ પોલીસે સલમાન ખાનના મુંબઈ સ્થિત ઘર પર ફાયરિંગ કેસમાં મકોકા કોર્ટમાં 1736 પાનાની ચાર્જશીટ દાખલ કરી હતી. લોરેન્સ સહિત 9 આરોપીઓના નામ છે. જેમાંથી 5ની ધરપકડ કરવામાં આવી છે. લોરેન્સ પહેલાથી જ અન્ય કેસમાં જેલમાં છે, જ્યારે અન્ય આરોપીઓ પોલીસ કસ્ટડીમાં છે. ચાર્જશીટમાં સલમાન ખાનનું નિવેદન પણ નોંધવામાં આવ્યું છે. તેણે કહ્યું હતું કે, 'મને અને મારા પરિવારને જુઠ્ઠાણાથી નિશાન બનાવવામાં આવી રહ્યા છે. મેં કંઈ પણ ખોટું કર્યું નથી. આ તમામ બાબતો મારી પાસેથી પૈસા પડાવવા માટે કરવામાં આવી રહી છે.' તેણે અગાઉ મળેલી ધમકીઓનો પણ ઉલ્લેખ કર્યો હતો. તપાસમાં જાણવા મળ્યું છે કે સલમાન ખાનના ઘરે ફાયરિંગ હત્યાના ઈરાદાથી કરવામાં આવ્યું ન હતું. આરોપી તેને ધમકી આપવા માગતો હતો. જો કે, તપાસમાં એ પણ સામે આવ્યું છે કે લોરેન્સ ગેંગના કેટલાક સભ્યો સલમાન ખાનને મારવા માટે તેની પર નજર રાખી રહ્યા હતા. તેઓએ હત્યા માટે પાકિસ્તાનમાંથી હથિયારો મેળવવાનો પ્રયાસ કર્યો હતો. નોંધનીય છે કે, 14 એપ્રિલે સવારે લગભગ 5 વાગે સલમાન ખાનના ગેલેક્સી એપાર્ટમેન્ટમાં બે બાઈકર્સે 4 રાઉન્ડ ફાયરિંગ કર્યું હતું. જ્યારે ફાયરિંગ થયું ત્યારે સલમાન ઘરમાં હાજર હતો. આ કેસમાં પહેલી ધરપકડ 15 એપ્રિલે કરવામાં આવી હતી. પોલીસે 2 આરોપીઓની ધરપકડ કરી હતી. આ પછી 24 એપ્રિલે હથિયાર પૂરાં પાડનાર આરોપીઓની ધરપકડ કરવામાં આવી હતી. 27 એપ્રિલ સુધી, આ કેસમાં 6 ધરપકડ કરવામાં આવી હતી, જેના પર મકોકાની કલમો લગાવવામાં આવી હતી. MCOCA કલમ લાગુ કર્યા પછી, 1 મેના રોજ, છ આરોપીઓમાંથી એક, અનુજ થાપને પોલીસ કસ્ટડીમાં આત્મહત્યા કરી લીધી હતી. MCOCA શું છે?
મહારાષ્ટ્ર સરકારે 1999માં MCOCA (મહારાષ્ટ્ર કંટ્રોલ ઓફ ઓર્ગેનાઈઝ્ડ ક્રાઈમ એક્ટ) લાગુ કર્યો હતો. તેનો ઉદ્દેશ્ય સંગઠિત અને અંડરવર્લ્ડ ગુનાઓને નાબૂદ કરવાનો હતો. આ કાયદો મહારાષ્ટ્ર અને દિલ્હીમાં લાગુ છે.
મકોકા લાગુ થયા બાદ આરોપીઓને સરળતાથી જામીન મળતા નથી. MCOCA હેઠળ, પોલીસને ચાર્જશીટ દાખલ કરવા માટે 180 દિવસનો સમય મળે છે, જ્યારે IPCની જોગવાઈઓ હેઠળ, આ સમય મર્યાદા માત્ર 60 થી 90 દિવસની છે. MCOCA હેઠળ, આરોપીના પોલીસ રિમાન્ડ 30 દિવસ સુધી હોઈ શકે છે, જ્યારે IPC હેઠળ તે મહત્તમ 15 દિવસ છે. સલમાન 'સિકંદર' ફિલ્મના શૂટિંગમાં વ્યસ્ત છે
હાલમાં સલમાન ખાન તેની આગામી ફિલ્મ 'સિકંદર'ના શૂટિંગમાં વ્યસ્ત છે. તેની ફિલ્મનું શૂટિંગ ફિલ્મસિટીમાં ચાલુ છે. શરૂઆતમાં, સલમાન ખાન રિયલ લોકેશન્સ પર શૂટિંગ કરવા જઈ રહ્યો હતો, જો કે, ધમકીઓ અને ફાયરિંગ મળ્યા પછી, સુરક્ષાના કારણોસર સલમાન હવે ફિલ્મસિટીમાં જ શૂટિંગ કરી રહ્યો છે.

આ પ્રકારના તમામ સમાચાર માટેે App ડાઉનલોડ કરો.