શું ટ્રમ્પ પર ફરીથી હુમલો કરવાનું ષડયંત્ર?:પાર્ટીના કાર્યક્રમની બહાર AK-47 સાથે યુવકની ધરપકડ, છરી સાથે પહોંચેલા વ્યક્તિની પણ હત્યા

અમેરિકાના પૂર્વ રાષ્ટ્રપતિ ડોનાલ્ડ ટ્રમ્પ પર 13 જુલાઈના રોજ જીવલેણ હુમલો થયો હતો. તેમના પર ફરીથી હુમલો થવાનો ભય છે. મંગળવારે અમેરિકાના મિલવૌકી શહેરમાં રિપબ્લિકન પાર્ટીના સંમેલનની બહાર પોલીસે 21 વર્ષીય યુવકની AK-47 સાથે ધરપકડ કરી હતી. તેના થોડા સમય બાદ, 43 વર્ષીય સેમ્યુઅલ શાર્પ બંને હાથમાં છરી પકડેલો જોવા મળ્યો હતો. તેણે એક વ્યક્તિ પર હુમલો પણ કર્યો હતો. આ પછી પોલીસે તરત જ તેના પર ગોળીબાર કર્યો, જેમાં સેમ્યુઅલનું મોત થયું. આ બંને ઘટનાઓ બાદ અમેરિકાની પોલીસ એલર્ટ પર છે. આ બંને ઘટનાઓ સંમેલન સ્થળની બહાર બની હતી. જ્યાં સોમવારે ટ્રમ્પને સત્તાવાર રીતે રાષ્ટ્રપતિ પદના ઉમેદવાર જાહેર કરવામાં આવ્યા હતા. હુમલાખોર ટ્રમ્પની પાર્ટીનો સમર્થક હતો
હકીકતમાં, 13 જુલાઈના રોજ પેન્સિલવેનિયાના બટલર શહેરમાં એક રેલીને સંબોધિત કરતી વખતે ટ્રમ્પ પર હુમલો કરવામાં આવ્યો હતો. આ દરમિયાન એક ગોળી ટ્રમ્પના કાનને અડીને પસાર થઈ ગઈ હતી. હુમલાખોરની ઓળખ 20 વર્ષીય થોમસ ક્રૂક્સ તરીકે થઈ હતી. તેણે AR-15 રાઈફલમાંથી 8 ગોળીઓ ચલાવી હતી. ગોળીબાર બાદ તરત જ સિક્રેટ સર્વિસના અધિકારીઓએ હુમલાખોરને ઠાર માર્યો હતો. તેઓ રિપબ્લિકન પાર્ટીના સમર્થક હતા. ટ્રમ્પની હત્યાનું કાવતરું ઈરાનથી ઘડવામાં આવી રહ્યું હતું
ટ્રમ્પ પર હુમલાની તપાસમાં ખુલાસો થયો છે કે અમેરિકન અધિકારીઓને કેટલાક અઠવાડિયા પહેલા ઈરાન પાસેથી ટ્રમ્પની હત્યાના ષડયંત્રની માહિતી મળી હતી. અમેરિકન મીડિયા સીએનએન અનુસાર, ગુપ્ત સેવાને ગુપ્ત માહિતી મળતાની સાથે જ ટ્રમ્પની સુરક્ષા વધારી દીધી હતી. જો કે, ટ્રમ્પ પર હુમલો કરનાર થોમસ આ ષડયંત્રનો ભાગ હતો કે નહીં તેની કોઈ માહિતી મળી નથી. યુએસ સિક્રેટ સર્વિસે દાવો કર્યો છે કે ટ્રમ્પ પર હુમલાના ષડયંત્ર સાથે જોડાયેલી માહિતી મળ્યા બાદ તેઓએ રિપબ્લિકન પાર્ટીને અલગ-અલગ રાજ્યોમાં સતત રેલીઓ અને ચૂંટણી અભિયાન ચલાવવા અંગે ચેતવણી પણ આપી હતી. ગુપ્ત માહિતી પછી પણ સિક્રેટ સર્વિસ સુરક્ષા આપી ના શકી
ટ્રમ્પ માટે ચૂંટણી પ્રચાર ચલાવી રહેલા લોકોએ આ મામલે વાત કરવાનો ઇનકાર કર્યો છે. તેમણે કહ્યું છે કે, તેઓ ટ્રમ્પની સુરક્ષાની વિગતો અથવા તેમના ચૂંટણી આયોજન અંગે ચર્ચા કરી શકતા નથી. ઈરાન પર હુમલાનું ષડયંત્ર પ્રકાશમાં આવ્યા બાદ અમેરિકાની સિક્રેટ સર્વિસ હરકતમાં આવી ગઈ છે. મીડિયા રિપોર્ટ્સમાં સવાલો ઉઠાવવામાં આવી રહ્યા છે કે હુમલાની આશંકા પહેલાથી જ હતી ત્યારે પણ ટ્રમ્પની સુરક્ષામાં કઈ રીતે ક્ષતિ રહી. આ પહેલા મંગળવારે સીએનએનએ તેના રિપોર્ટમાં દાવો કર્યો હતો કે સર્વિસ યુનિટના સ્નાઈપર્સ બિલ્ડિંગના બીજા માળે તૈનાત હતા જેની છત પરથી હુમલાખોરે ટ્રમ્પ પર હુમલો કર્યો હતો. પિતાના નામે નોંધાયેલી બંદૂકથી હુમલો
પેન્સિલવેનિયા પોલીસના રેકોર્ડમાં ખુલાસો થયો છે કે ક્રૂક્સ દ્વારા ટ્રમ્પ પર હુમલો કરવા માટે ઉપયોગમાં લેવાતી AR-15 એસોલ્ટ રાઈફલ તેના પિતાના નામે ખરીદી હતી. તેમના નામે 20થી વધુ બંદૂકો નોંધાયેલી છે, જે ઘરમાં હાજર હતી. સીએનએનએ રવિવાર અને સોમવારે થોમસના પિતા સાથે વાત કરવાનો પ્રયાસ કર્યો, પરંતુ તેમણે પ્રશ્નોના જવાબ આપવાનો ઇનકાર કર્યો. હાલમાં થોમસના માતા-પિતા તપાસમાં મદદ કરી રહ્યા છે. તેઓએ એજન્સીઓને જણાવ્યું કે થોમસનો કોઈ મિત્ર નથી અને તે કોઈપણ પક્ષ તરફ ઝુકાવતો નથી. થોમસનો ફોન, કોમ્પ્યુટર, સર્ચ હિસ્ટ્રી અને બેડરૂમની તપાસ કરવા છતાં તેનો હેતુ જાણી શકાયો નથી. આ અંગે તેના પરિવારજનો અને મિત્રોની પણ પૂછપરછ કરવામાં આવી છે, પરંતુ એજન્ટો કોઈ પુરાવા મેળવી શક્યા નથી. તેની ઓનલાઈન પ્રવૃત્તિઓથી જાણવા મળ્યું કે તેને કોમ્પ્યુટર કોડિંગ અને ગેમિંગમાં રસ હતો.

આ પ્રકારના તમામ સમાચાર માટેે App ડાઉનલોડ કરો.