છૂંદાઈ જવાથી પાંસળીઓ-હાડકાં હૃદયમાં ઘૂસ્યાં:15ને માથામાં ફ્રેક્ચર, 74નાં ગૂંગળામણથી મોત; નાસભાગમાં મૃત્યુ પામનારા 123માંથી 113 મહિલા

યુપીના હાથરસમાં સત્સંગ બાદ થયેલી નાસભાગમાં અત્યારસુધીમાં 123 લોકોનાં મોત થયાં છે, જેમાંથી 74નાં મોત ગૂંગળામણને કારણે થયાં છે. નાસભાગમાં જમીન પર પડી ગયેલી મહિલાઓ અને બાળકો કચડાઈ ગયાં હતાં અને ફરી ઊભાં પણ ન થઈ શક્યાં. 31 મહિલાના મૃતદેહ એવા હતા કે તેમની પાંસળીઓ તૂટીને હૃદય અને ફેફસાંમાં ઘૂસી ગઈ હતી. 15 લોકોનાં માથાં અને ડોકનાં હાડકાં તૂટી ગયાં હતાં, જેના કારણે તેમનાં મોત થયાં હતાં. મૃતદેહોના પોસ્ટમોર્ટમ રિપોર્ટમાં આ વાત સામે આવી છે. હાથરસમાં થયેલી દુર્ઘટનાથી બે મોટા સવાલ સામે આવ્યા છે. જાણો બંને સવાલના જવાબ... 1. આટલાં મોત કેમ થયાં?
સત્સંગ ખાલી મેદાનમાં થયો. હળવા વરસાદ બાદ કાદવ થયો હતો. લોકો કાદવમાં લપસીને પડ્યા અને ઊભા પણ ન થઈ શક્યા. પછી પાછળના લોકો તેમને કચડીને નીકળતા રહ્યા. તેથી વધુ મૃત્યુ થયાં હતાં. જે મૃતદેહો પોસ્ટમોર્ટમ માટે પહોંચ્યા તેમના શરીર પર માત્ર માટી જ ચોંટેલી હતી. કાન, નાક અને મોઢામાં પણ કાદવ હતો. 2. મહિલાઓનાં વધુ મોત કેમ થયાં?
મૃત્યુ પામેલાઓમાં લગભગ 113 મહિલાઓ હતી. 7 બાળકો અને 3 પુરુષો છે. ડોક્ટરોના જણાવ્યા મુજબ, નાસભાગ પછી મહિલાઓ પડી ગઈ હતી, પરંતુ તે ફરીથી ભીડ સાથે ઊભા રહેવા માટે પૂરતી તાકાત એકત્ર કરી શકી ન હતી. ભીડ તેમની ઉપરથી પસાર થતી રહી. આ જ કારણ છે કે મોટાભાગની મહિલાઓના શરીરમાં તૂટેલાં હાડકાં જોવા મળે છે. નાસભાગમાં 123 લોકોનાં મોત થયા હતા. આ મૃતદેહોને હાથરસની સાથે અલીગઢ, આગ્રા અને એટામાં મોકલવામાં આવ્યા હતા. 24 કલાકમાં 120 લોકોના પોસ્ટમોર્ટમ કરાયા. એકની ઓળખ થઈ શકી નથી. તેથી જ તેનું પોસ્ટમોર્ટમ થયું ન હતું. બે મૃતદેહોને તેમનાં પરિવારજનો પોસ્ટમોર્ટમ કર્યા વિના લઈ ગયા હતા. અલીગઢથી પ્રથમ પોસ્ટમોર્ટમ રિપોર્ટ આવ્યો... 6 ડોક્ટરની પેનલે 37 પોસ્ટમોર્ટમ કર્યા
પહેલા અલીગઢની વાત કરીએ. દુર્ઘટનાના 6 કલાક બાદ પ્રથમ મૃતદેહ અહીં પહોંચ્યો હતો. થોડા કલાકોમાં 38 મૃતદેહો આવ્યા. તેમાંથી 35 મહિલાઓ, 2 બાળકો અને 1 પુરુષનો મૃતદેહ હતો. એક મૃતદેહ તેનાં પરિવારજનો પોસ્ટમોર્ટમ કર્યા વગર લઈ ગયાં હતાં. અહીં 37 લોકોના રિપોર્ટ તૈયાર કરવામાં આવ્યા હતા. જેમાં 10 લોકોના શ્વાસ રૂંધાવાથી મોત થયા હતા. 19 મૃતદેહો એવા હતા જેમની પાંસળીઓ તૂટી ગઈ હતી અને શરીરની અંદરના અન્ય ભાગોમાં ઘૂસી ગઈ હતી. જેના કારણે તેનું મોત થયું હતું. 8 મૃતદેહો એવા હતા જેમના માથા અને ગરદનનાં હાડકાં તૂટેલાં મળી આવ્યાં હતાં. ત્યાર બાદ આગ્રાથી 21 મૃતદેહોનો રિપોર્ટ આવ્યો... 15 મહિલાનાં ગૂંગળામણથી મોત, 3નાં માથાંમાં ફ્રેક્ચર
આગ્રાની એસએન મેડિકલ કોલેજમાં પોસ્ટમોર્ટમ માટે 21 મહિલાઓના મૃતદેહ લાવવામાં આવ્યા હતા. CMO ડૉ. અરુણ શ્રીવાસ્તવે કહ્યું- 15 લોકોનાં મોત ગૂંગળામણને કારણે થયાં છે. તેમની છાતીમાં લોહી ભરાયેલું જોવા મળ્યું હતું. તેમના શરીર પર માત્ર માટી હતી. 3 લોકોને માથાના ભાગે ઊંડી ઈજાઓ થઈ હતી. 3 લોકો એવા હતા જેમની પાંસળી તૂટીને હૃદય અને ફેફસાંમાં ઘૂસી ગઈ હતી. જેના કારણે તેમનું મોત થયું હતું. મૃત્યુ પામેલા લોકોમાં ત્રણ ફરીદાબાદના અને એક પીલીભીતનો હતો. તેમની ઉંમર 35થી 60 વર્ષની વચ્ચે હતી. 8 ડોક્ટર અને 6 ફાર્માસિસ્ટ સપોર્ટમાં લાગ્યા
પોસ્ટમોર્ટમ હાઉસમાં 8 તબીબો ફરજ પર હતા. ડોક્ટર 4 પોસ્ટમોર્ટમ કર્યા બાદ બ્રેક લેતા હતા. રાત્રે 3 વાગ્યે પોસ્ટમોર્ટમ શરૂ થયા પછી, તે બીજા દિવસે બપોરે 2 વાગ્યા સુધી ચાલુ રહ્યું. સપોર્ટ માટે 6 ફાર્માસિસ્ટ અને 10 સફાઈ કામદારોની પણ ડ્યૂટી લાદવામાં આવી હતી. આ તમામ પોસ્ટમોર્ટમ ACMO ડૉ. નંદન સિંહ અને ડૉ. અમિત રાવતની દેખરેખ હેઠળ થયાં હતાં. પોસ્ટમોર્ટમ હાઉસના ઈન્ચાર્જ જયપાલ ચાહરે કહ્યું- ડૉ. અનુજ ગાંધી, ડૉ. વિમલ કુમાર, ડૉ. અભિષેક પરિહાર અને ડૉ. અભિષેક ચૌહાણ રાત્રે ડ્યૂટી પર હતા. દિવસ માટે ડ્યૂટી પર ડો. ઉદય રાવલ, ડો. મોહિત બંસલ, ડો. અજય યાદવ અને ડો. અતુલ ભારતી હતા. હાથરસમાં 34 મૃતદેહોનું પોસ્ટમોર્ટમ 22 મહિલાની છાતીમાં લોહી મળી આવ્યું
નાસભાગ બાદ હાથરસની જિલ્લા હોસ્પિટલમાં મૃતદેહોનો ઢગલો થઈ ગયો હતો. સીએમઓ ડૉ.મનજિત સિંહે તરત જ ડૉક્ટરોની એક પેનલ બનાવી. જેમણે સારવાર અને પોસ્ટમોર્ટમની જવાબદારી લીધી હતી. અહીં 34 મૃતદેહોનું પોસ્ટમોર્ટમ કરવામાં આવ્યું હતું. જેમાંથી 22 મહિલાઓની છાતીમાં લોહી ભરાયેલું જોવા મળ્યું હતું. તેમાંથી મોટાભાગના લોકોના કાન, નાક અને મોઢામાં માટી હતી. 8 લોકોની છાતીનાં હાડકાં તૂટીને અન્ય અંગોમાં ઘૂસી ગયાં હતાં. એટામાં 28 મૃતદેહો આવ્યા, 27નું પોસ્ટમોર્ટમ થયું એટાના પોસ્ટમોર્ટમ હાઉસમાં 28 મૃતદેહો લાવવામાં આવ્યા હતા. તેમાંથી 27નું પોસ્ટમોર્ટમ થઈ શક્યું. 1નું પોસ્ટમોર્ટમ થાય તે પહેલાં જ પરિવાર મૃતદેહ ઘરે લઈ ગયો. પોસ્ટમોર્ટમ રિપોર્ટ અનુસાર, તમામ 27 લોકોનાં મોત શ્વાસ રૂંધાવાથી થયા છે. 6 ડોકટરની ટીમ 24 કલાક કાર્યરત રહી
પોસ્ટમોર્ટમ એટા મેડિકલ કોલેજના પ્રિન્સિપાલ ડૉ. રજની પટેલ, CMO ડૉ. ઉમેશ કુમાર ત્રિપાઠી, ડૉ. સુરેશ ચંદ્રાની દેખરેખ હેઠળ કરવામાં આવ્યું હતું. ડો.રાહુલ વાર્શ્નેય, ડો.આર.કે.દયાલ, ડો.અભિનવ દુબે, ડો.મોહિત, ડો.સંજય, ડો.રાહુલ ચતુર્વેદીની ટીમે મૃત્યુનાં ચોક્કસ કારણનો રિપોર્ટ તૈયાર કર્યો હતો.

આ પ્રકારના તમામ સમાચાર માટેે App ડાઉનલોડ કરો.