‘યે રિશ્તા ક્યા…’ની અક્ષરાને બ્રેસ્ટ કેન્સર:એક્ટ્રેસ હિના ખાને કહ્યું, ‘ત્રીજા સ્ટેજનું કેન્સર છે, તમારા બધાના પ્રેમની જરૂર છે’

ટેલિવિઝન એક્ટ્રેસ હિના ખાન વિશે એક ચોંકાવનારા સમાચાર સામે આવ્યા છે. હિના ખાન બ્રેસ્ટ કેન્સર સામે ઝઝૂમી રહી છે. તે કેન્સરના ત્રીજા સ્ટેજમાં છે. તેણે પોતે આ સમાચાર સોશિયલ મીડિયા પર ફેન્સ સાથે શેર કર્યા છે. સોશિયલ મીડિયા પોસ્ટ શેર કરતી વખતે એક્ટ્રેસે કહ્યું છે કે તેની સારવાર શરૂ થઈ ગઈ છે. તે દરેકના પ્રેમ માટે આભારી છે. સો.મીડિયા પર આપી જાણકારી
હાલમાં જ સમાચાર આવ્યા હતા કે હિના ખાન કેન્સરથી પીડિત છે, પરંતુ ભાગ્યે જ કોઈએ આ સમાચાર પર વિશ્વાસ કર્યો હશે, પરંતુ હવે જ્યારે એક્ટ્રેસે પોતે જ તેના કેન્સરની બીમારીનો ખુલાસો કર્યો છે ત્યારે દરેક ફેન્સ શોકમાં ગરકાવ છે. બ્રેસ્ટ કેન્સર વિશે વાત કરતાં એક્ટ્રેસે લખ્યું, 'મારા વિશે કેટલીક અફવાઓ ચાલી રહી છે. હું તમારા બધા સાથે એક જરૂરી સમાચાર શેર કરવા માગું છું. ખાસ કરીને જેઓ મને પ્રેમ કરે છે, મારી કાળજી રાખે છે. મને ત્રીજા સ્ટેજનું બ્રેસ્ટ કેન્સર છે. એની સારવાર શરૂ કરવામાં આવી છે. ઘણી સમસ્યાઓનો સામનો કરવા છતા હું તમને ભરોસો આપું છું કે હું ઠીક છું. હું આ બીમારી સામે લડવા માટે સંપૂર્ણ રીતે તૈયાર છું. આ સમયે હું એ દરેક કામ કરવા તૈયાર છું, જે મને મજબૂત રાખશે.' 'પ્રાઇવસીનું ધ્યાન રાખજો'
બ્રેસ્ટ કેન્સર વિશે જણાવતાં હિનાએ કહ્યું હતું કે તેની પ્રાઈવસીનું ધ્યાન રાખવું જોઈએ. હું તમારા પ્રેમ અને સન્માનની પ્રશંસા કરું છું, પરંતુ આ સમયે મારી પ્રાઇવસીનું ધ્યાન રાખવું જોઈએ. મને અને મારા પરિવારને વિશ્વાસ છે કે હું કેન્સરની લડાઈ જીતી જઈશ અને જલદી સ્વસ્થ થઈ જઈશ, પણ ત્યાં સુધી થોડું ધ્યાન રાખજો. આ સમયે મને તમારા પ્રેમ અને પ્રાર્થનાની ખૂબ જ જરૂર છે.' 'યે રિશ્તા ક્યા કહેલાતા' શોથી પ્રસિદ્ધિ મળી
હિના ખાન ટેલિવિઝન શો 'યે રિશ્તા ક્યા કહેલાતા'માં અક્ષરાના રોલથી જાણીતી છે. આ શોમાં તેણે સંસ્કારી વહુનો રોલ નિભાવીને દરેક ઘરમાં પોતાની જગ્યા બનાવી હતી. ‘કસોટી ઝિંદગી કી 2’માં કોમોલિકાનો રોલ પ્લે કર્યો હતો. આ પછી તે 'બિગ બોસ 11'માં પણ જોવા મળી હતી. હિના આ શોની વિજેતા તો નથી બની, પરંતુ બિગ બોસથી તેની લોકપ્રિયતા બમણી થઈ ગઈ છે. 'લાઇન્સ' ફિલ્મથી ડેબ્યૂ કર્યું
2020માં હિના ખાને 'હેક્ડ' ફિલ્મથી બોલિવૂડ ડેબ્યૂ કર્યું હતું. ત્યાર બાદ તેણે 'લાઇન્સ'માં કામ કર્યું હતું. આ ફિલ્મને હુસૈન ખાને ડિરેક્ટ કરી છે. જ્યારે રાહત કાઝમી તથા શક્તિ સિંહે લખી છે. ફિલ્મમાં ફરીદા જલાલ પણ હતાં. હિના ખાન શોર્ટ ફિલ્મ 'સોલમેટ'માં વિઆન ભટેના સાથે જોવા મળી હતી. આ ફિલ્મને પવન શર્માએ ડિરેક્ટ કરી હતી. ટેલિવિઝન શો ઉપરાંત તેણે વેબ શો અને મૂવીઝમાં કામ કર્યું છે. હિના ખાને ઘણા મ્યુઝિક વીડિયોમાં પોતાની એક્ટિંગથી લોકોનાં દિલ જીતી લીધાં છે. પિતાના અવસાનથી ભાંગી પડી હતી
હિના ખાન તેના પરિવારની ખૂબ જ નજીક છે. એક્ટ્રેસ ઘણીવાર ઇન્ટરવ્યૂમાં તેનાં માતાપિતા અને ભાઈનો ઉલ્લેખ કરતી જોવા મળે છે. 2021માં તેમના પિતા અસલમ ખાનનું હાર્ટ-એટેકથી અવસાન થયું હતું. જ્યારે તેના પિતાનું અવસાન થયું ત્યારે તે કાશ્મીરમાં શૂટિંગ કરી રહી હતી. પિતાના ગયા બાદ હિના ખાન સંપૂર્ણ રીતે ભાંગી પડી હતી અને તેને ગુમાવવાનું દુ:ખ આજ દિવસ સુધી ભૂલી શકી નથી. એક ઇન્ટરવ્યૂમાં પોતાના પિતા વિશે વાત કરતી વખતે તેણે કહ્યું હતું કે આજે તે ઘણી બાબતોને લઈને ચૂપ છે, કારણ કે તે તેના પિતાને આપેલું વચન તોડવા માગતી નથી.

આ પ્રકારના તમામ સમાચાર માટેે App ડાઉનલોડ કરો.