પુતિનની માસ્ટર ડ્રાઇવિંગ, VIDEO:નોર્થ કોરિયાના રસ્તાઓ પર કિમ જોંગ-ઉન માટે કાર ચલાવી, ઓરસ લક્ઝરી કાર ભેટમાં આપી

રશિયાના રાષ્ટ્રપતિ વ્લાદિમીર પુતિન અને ઉત્તર કોરિયાના સરમુખત્યાર કિમ જોંગ-ઉનનો એક વીડિયો વાઇરલ થઈ રહ્યો છે. આમાં પુતિન કાર ચલાવી રહ્યા છે અને કિમ જોંગ-ઉન આગળની સીટ પર બેઠા છે. આ દરમિયાન બંને હસતા અને વાતો કરતા નજરે પડી રહ્યા છે. બાદમાં પુતિને કિમને ઓરસ લિમોઝિન લક્ઝરી કાર ભેટમાં આપી હતી. તેમની મુલાકાત દરમિયાન પુતિને કિમને સ્કીવર અને ચાનો સેટ પણ ભેટમાં આપ્યો હતો. પુતિનના સહયોગી યુરી ઉશાકોવે કહ્યું, 'આ ભેટો પુતિનની છબી દર્શાવે છે. આ પહેલીવાર નથી જ્યારે પુતિનને લક્ઝરી ગિફ્ટ આપવામાં આવી હોય. ગયા વર્ષે ફેબ્રુઆરીમાં પણ પુતિને તેમને ઓરસ લિમોઝીન કાર ભેટમાં આપી હતી. કાર ચલાવતા પુતિન અને કિમ જોંગની તસવીરો... પુતિન 24 વર્ષ બાદ ઉત્તર કોરિયા ગયા
રશિયાના રાષ્ટ્રપતિ વ્લાદિમીર પુતિને 24 વર્ષ બાદ બુધવારે સવારે ઉત્તર કોરિયાની મુલાકાત લીધી હતી. એરપોર્ટ પર સરમુખત્યાર કિમ જોંગ ઉને ખુદ તેમનું સ્વાગત કર્યું હતું. પુતિન સાથે રશિયાના 10 મંત્રીઓ અને અધિકારીઓનું પ્રતિનિધિમંડળ હાજર હતું. જેમાં વિદેશ મંત્રી સર્ગેઈ લાવરોવ અને સંરક્ષણ મંત્રી એન્ડ્રે બેલોસોવનો સમાવેશ થાય છે. રશિયન રાષ્ટ્રપતિના સ્વાગત માટે એરપોર્ટ પર રેડ કાર્પેટ બિછાવવામાં આવી હતી. બંને નેતાઓએ એકબીજાને ગળે પણ લગાવ્યા હતા. આ પછી પુતિનનું રાજધાની પ્યોંગયાંગના સિટી સ્ક્વેર પર સત્તાવાર રીતે સ્વાગત કરવામાં આવ્યું. ચોકને રંગબેરંગી ફુગ્ગાઓથી શણગારવામાં આવ્યો હતો. પુતિનના મોટર કેડને જોવા માટે હજારો લોકો રસ્તાઓ પર એકઠા થયા હતા. તેના હાથમાં રશિયા અને ઉત્તર કોરિયાના ઝંડા હતા. આ સિવાય કેટલીક ઇમારતો પર પુતિન અને કિમ જોંગના મોટા પોસ્ટર પણ લગાવવામાં આવ્યા હતા. શહેરના ચોકમાં પુતિનને આવકારવા માટે લશ્કરી બેન્ડે બંને દેશોના રાષ્ટ્રગીત વગાડ્યા હતા. આ દરમિયાન ત્યાં એકઠા થયેલા બાળકોના હાથમાં રંગબેરંગી ફૂલો પણ હાજર હતા. સમગ્ર કાર્યક્રમ દરમિયાન કિમ જોંગની બહેન કિમ યો જોંગ પણ ત્યાં હાજર હતી. ઉત્તર કોરિયાની 105 માળની ઈમારત રંગબેરંગી લાઈટોથી ઝળહળી ઉઠી
બ્રિટિશ મીડિયા બીબીસી અનુસાર, પુતિનને આવકારવા માટે ભવ્ય પરેડ ઉપરાંત પ્યોંગયાંગની 105 માળની રૂગ્યોંગ હોટલને એલઈડી લાઈટ્સથી શણગારવામાં આવી હતી. તેના પર 'વેલકમ પુતિન' અને 'ફ્રેન્ડશિપ' લખેલું જોવા મળ્યું હતું. રશિયન સમાચાર એજન્સી ઈન્ટરફેક્સના જણાવ્યા અનુસાર બંને નેતાઓ વચ્ચે દ્વિપક્ષીય બેઠક પણ થઈ હતી. આ દરમિયાન પુતિને યુક્રેન યુદ્ધમાં રશિયાને સાથ આપવા બદલ કિમ જોંગનો આભાર માન્યો હતો. પુતિને એક નવા મૂળભૂત દસ્તાવેજની પણ જાહેરાત કરી, જે બંને દેશો વચ્ચેના સંબંધોનો પાયો બનાવશે. પુતિને કહ્યું કે, ગયા વર્ષે કિમ જોંગની રશિયાની મુલાકાત દરમિયાન બંને દેશો વચ્ચેના સંબંધો મજબૂત થયા હતા. હવે આ ભાગીદારીને આગળ લઈ જવા માટે એક નવો મૂળભૂત દસ્તાવેજ બનાવવામાં આવ્યો છે.

આ પ્રકારના તમામ સમાચાર માટેે App ડાઉનલોડ કરો.