મોદી સૌથી વધુ ચીનના પ્રવાસે ગયેલા PM:10 વર્ષમાં 66 દેશોમાં ગયા, અચાનક પાકિસ્તાન પહોંચ્યા હતા; આ વખતે શા માટે પ્રથમ પ્રવાસે ઇટલી ગયા છે

"હું ખુશ છું કે હું મારા કાર્યકાળના મારા પ્રથમ પ્રવાસે ઇટલી ગયો છું." વડાપ્રધાન નરેન્દ્ર મોદીએ 13 જૂને G7 સમિટ માટે રવાના થતાં પહેલાં આ વાત કહી હતી. તેમના છેલ્લા બે કાર્યકાળમાં, વડાપ્રધાને હંમેશાં તેમની પ્રથમ મુલાકાત માટે તેમના પડોશી દેશોને પસંદ કર્યા હતા. 2014માં જ્યારે તેઓ પહેલીવાર વડાપ્રધાન બન્યા ત્યારે તેઓ વિદેશ પ્રવાસ પર નેપાળ ગયા હતા. જ્યારે તેઓ બીજી વખત વડાપ્રધાન બન્યા ત્યારે તેઓ માલદીવ્સ ગયા હતા. આ વખતે તેમણે પશ્ચિમી દેશ ઈટલીને પસંદ કર્યો. 'નેબરહુડ ફર્સ્ટ' એટલે કે પાડોશી પ્રથમવાળી પોલિસીને અનુસરતા વડાપ્રધાન મોદીએ આવું કેમ કર્યું? 2015માં પાકિસ્તાનની મુલાકાત લેવાની હોય કે 2019માં શી જિનપિંગને ભારત આવવાનું આમંત્રણ હોય, મોદીએ દરેક કાર્યકાળમાં પોતાની વિદેશનીતિથી દેશને ચોંકાવી દીધો છે. આ સ્ટોરીમાં જાણો છેલ્લાં 10 વર્ષમાં મોદીના વિદેશ પ્રવાસો કેવા રહ્યા... પૂર્વ રાજદૂત અશોક સજ્જનહારના કહેવા પ્રમાણે, 2014માં જ્યારે નરેન્દ્ર મોદી પહેલીવાર વડાપ્રધાન બન્યા ત્યારે એવું માનવામાં આવતું હતું કે વિદેશનીતિ તેમની સત્તાની સૌથી નબળી કડી હશે. જો કે, આવું બન્યું ન હતું. નેબરહુડ ફર્સ્ટ પોલિસી અને રશિયા-યુક્રેન યુદ્ધમાં સરકારના મજબૂત વલણે મોદીને વિદેશી બાબતોમાં પણ વધુ સારા નેતા સાબિત કર્યા. 2014માં શપથ લીધા બાદ તેઓ નેપાળના પ્રવાસે ગયા હતા. પાડોશી દેશ હોવા છતાં 17 વર્ષ સુધી કોઈ ભારતીય પીએમ અહીં ગયા ન હતા. મોદીએ ગલ્ફ દેશો સાથે પણ સંબંધો મજબૂત કર્યા. 30 વર્ષ બાદ UAEની મુલાકાત લેનારા તેઓ પ્રથમ ભારતીય વડાપ્રધાન બન્યા છે. મોદીએ પોતાના પ્રથમ કાર્યકાળમાં 5 વખત ચીનની મુલાકાત લીધી હતી. તેઓ એવા ભારતીય વડાપ્રધાન છે કે જેમણે સૌથી વધુ વખત ચીનની મુલાકાત લીધી છે. આમ છતાં ચીને 2020માં ગલવાનમાં ઘૂસણખોરી કરીને બંને દેશોના સંબંધોને બગાડ્યા હતા. જો કે સજ્જનહાર માને છે કે આને મોદીની વિદેશનીતિની નિષ્ફળતા ન કહી શકાય. આ ચીન દ્વારા કરવામાં આવેલી ભૂલ છે. અત્યાર સુધી સરકાર પોતાની બહુમતી પણ સાબિત નથી કરી શકી તો પછી PM મોદી શા માટે ઈટલી જઈ રહ્યા છે?
વિદેશી બાબતોના નિષ્ણાત પ્રોફેસર રાજન કુમારનું કહેવું છે કે ઈટલીને પસંદ કરવાનું સૌથી મોટું કારણ G7 સમિટ છે. ભારત આ બ્લોકની બેઠકોમાં સતત હાજરી આપી રહ્યું છે. આ વખતે G7 ઈટલીમાં થઈ રહ્યું છે. એટલા માટે મોદી ત્યાં ગયા છે. G7 એક એવું પ્લેટફોર્મ છે જ્યાંથી ભારતને વિશ્વના સૌથી ધનિક અને વિકસિત દેશો સમક્ષ પોતાના વિચારો રજૂ કરવાની તક મળે છે. આવી સ્થિતિમાં ભારતની વિદેશનીતિ માટે ત્યાં જવું મહત્ત્વપૂર્ણ છે. આ એક મોટું કારણ છે કે મોદી બહુમતી સાબિત કરતા પહેલાં જ ઈટલીની મુલાકાતે છે. મોદી સરકારની વિદેશનીતિ સામે પડકારો
વિશ્વભરમાં ભારતનું વધતું કદ અને નિશ્ચિત વિદેશનીતિને મોદી સરકારની મોટી સિદ્ધિઓ તરીકે જોવામાં આવે છે. જો કે, તાજેતરનાં વર્ષોમાં ચીન સાથે ભારતના સંબંધો તણાવપૂર્ણ રહ્યા છે. તેની શરૂઆત ગલવાન ઘાટીમાં બંને દેશોના સૈનિકો વચ્ચેની અથડામણથી થઈ હતી. જેમાં 20 ભારતીય અને 4 ચીની સૈનિકો માર્યા ગયા હતા. ગયા મહિને પીએમ મોદીએ ચીન સાથેના સંબંધો પર પોતાનું મૌન તોડ્યું હતું. તેમણે કહ્યું હતું કે સરહદો પર બંને દેશો વચ્ચે લાંબા સમયથી ચાલી રહેલી સ્થિતિને તાત્કાલિક ઉકેલવાની જરૂર છે. ભારતના કેનેડા સાથે પણ તણાવપૂર્ણ સંબંધો છે. કેનેડાએ ભારત સરકાર પર ખાલિસ્તાની હરદીપ સિંહ નિજ્જરની હત્યાનો આરોપ લગાવ્યો હતો. આ પછી અમેરિકાએ ભારતીય અધિકારીઓ પર શીખ અલગતાવાદી ગુરપતવંત સિંહ પન્નુની હત્યાનો પ્રયાસ કરવાનો આરોપ પણ લગાવ્યો હતો. બંને કેસમાં તપાસ ચાલી રહી છે. તેનાથી દેશની છબીને નુકસાન થયું છે. ગ્રાફિક્સ - કુણાલ શર્મા સ્કેચ- સંદીપ

આ પ્રકારના તમામ સમાચાર માટેે App ડાઉનલોડ કરો.