સહકારનગરમાં મંદિરના પટાંગણમાં બેસી બે શખ્સે સરાજાહેર દારૂ પીધો, પોલીસે બન્નેની ધરપકડ કરી

શહેરમાં દારૂબંધીની વાતો માત્ર કાગળ પર હોવાના આક્ષેપો વધુ એક વાર બહાર આવ્યા હોય તેમ ઢેબર રોડ પરના સહકારનગરમાં આવેલા મંદિરના પટાંગણમાં બાંકડે બેસીને સરાજાહેર મદિરાપાન કરતાં શખ્સનો વીડિયો વાઇરલ થયો હતો. યુવક પોતે તેનો વીડિયો ઉતારતો હોવાની જાણ થતાં આ શખ્સ ગ્લાસમાં વધેલ પણ પી જઇ બીજા શખ્સને હાલો હવે હાલો નીકળીએ કહી ઊભો થઇ જતો રહે છે. બાદમાં ફરીથી વીડિયો ઉતારનાર પાસે આવીને એલા તે ઓલા માજીને શું કીધું ? તેમ કહે છે. અને બાદમાં હું તો પાણી પીતો હતો, થમ્સઅપ હતી..એવું કહી હસતો હસતો નીકળી જાય છે. બનાવ સોશિયલ મીડિયામાં વાઇરલ થતા એક્શનમાં આવેલા ભક્તિનગર પોલીસ મથકના પી.એસ.આઇ.વસાવા સહિતના સ્ટાફે તપાસ કરતા સહકારનગરમાં રહેતો મિતેશ કાંતિભાઇ સગપરિયા અને તેનો મિત્ર મવડી ફાયર બ્રિગેડ પાસેના ચંદ્રેશનગરમાં રહેતો ભાવિન શશીકાંતભાઇ રૂપારેલિયાએ સહકારનગરમાં મંદિરના બાંકડે બેસી દારૂની મહેફિલ કરી હોવાનું બહાર આવતા પોલીસે બન્ને શખ્સ સામે નશો કરવાનો ગુનો નોંધી બન્નેની ધરપકડ કરી વિશેષ કાર્યવાહી કરી હતી.

આ પ્રકારના તમામ સમાચાર માટેે App ડાઉનલોડ કરો.