પુણે પોર્શ કેસમાં સગીર આરોપીના દાદાની ધરપકડ:પૌત્રને બચાવવા ડ્રાઇવરને ફસાવવાનો પ્લાન ઘડ્યો, બે દિવસ સુધી બંગલામાં ગોંધી રાખ્યો

​​​​​​પુણે પોલીસની ક્રાઈમ બ્રાન્ચે શનિવારે (25 મે) પોર્શ અકસ્માત કેસમાં સગીર આરોપીના દાદા સુરેન્દ્ર અગ્રવાલની ધરપકડ કરી છે. તેમના પર પરિવારના ડ્રાઈવરને બંધક બનાવવાનો આરોપ છે. આ કેસમાં સગીરના પિતા વિશાલ અગ્રવાલ પણ આરોપી છે. પોલીસે 21 મેના રોજ તેમની ધરપકડ કરી હતી. પોલીસના જણાવ્યા અનુસાર, 18 મેની રાત્રે થયેલા અકસ્માત બાદ આરોપીના દાદા અને પિતાએ સગીરને બચાવવા માટે ડ્રાઈવરનો પ્લાન ઘડ્યો હતો. તેઓએ ડ્રાઇવરનો ફોન છીનવી લીધો અને તેને 19 થી 20 મે સુધી તેમના બંગલામાં ગોંધી રાખ્યો. બાદમાં ડ્રાઈવરને તેની પત્નીએ છોડાવ્યો હતો. આરોપી સગીરના દાદા સુરેન્દ્ર અગ્રવાલે 23 મેના રોજ દાવો કર્યો હતો કે ઘટના સમયે તેનો ફેમિલી ડ્રાઈવર કાર ચલાવી રહ્યો હતો. તેમજ, આરોપીના પિતા વિશાલે પણ પોલીસને કહ્યું હતું કે કાર તેમનો પુત્ર નહીં પરંતુ અમારા પરિવારનો ડ્રાઈવર ચલાવી રહ્યો હતો. પોલીસ પૂછપરછ દરમિયાન ડ્રાઈવરે પણ પોતાના પ્રથમ નિવેદનમાં કાર ચલાવવાનું કબૂલ્યું હતું. પોર્શ કેસની તપાસ હવે ક્રાઈમ બ્રાન્ચ કરશે
પુણેના પોલીસ કમિશનર અમિતેશ કુમારે શુક્રવારે (24 મે) કહ્યું હતું કે પુણે પોર્શ કેસની તપાસ હવે ક્રાઈમ બ્રાન્ચ કરશે. યરવડા પોલીસ સ્ટેશને કેસ ક્રાઈમ બ્રાન્ચને ટ્રાન્સફર કર્યો છે. ક્રાઈમ બ્રાંચ પહેલાથી જ આરોપી સગીરના પિતા વિશાલ અગ્રવાલ અને બે પબ માલિકો સામે તપાસ કરી રહી છે. આ મામલામાં બેદરકારી બદલ યરવડા પોલીસ સ્ટેશનના ઇન્સ્પેક્ટર રાહુલ જગદાલે અને ASI વિશ્વનાથ તોડકરીને સસ્પેન્ડ કરવામાં આવ્યા છે. આ બંનેએ ઘટનાની રાત્રે તેમના વરિષ્ઠ અધિકારીઓને (ઓન-ડ્યુટી પોલીસ ડેપ્યુટી કમિશનર) ને અકસ્માત વિશે જાણ કરી ન હતી. કલ્યાણી નગરમાં 18મી મેની રાત્રે જ્યારે આ દુર્ઘટના થઈ ત્યારે ઈન્સ્પેક્ટર જગદાલે અને એએસઆઈ તોડકરી ઘટનાસ્થળે પહોંચી ગયા હતા, પરંતુ બંનેએ કંટ્રોલ રૂમને ઘટનાની જાણ કરી ન હતી. પોલીસનો આરોપ છે કે પોલીસ સ્ટેશનમાં આરોપીને ખાસ સારવાર આપવામાં આવતી હતી. આરોપી પિતાના 7 જૂન સુધી પોલીસ રિમાન્ડ
24 મેના રોજ સ્પેશિયલ કોર્ટે આરોપી સગીરના પિતા વિશાલ અગ્રવાલ સહિત તમામ છ આરોપીઓને 7 જૂન સુધી જ્યુડિશિયલ કસ્ટડીમાં મોકલી દીધા હતા. પોલીસ કમિશનર અમિતેશ કુમારે કહ્યું કે આ મામલે પોલીસનો પક્ષ રજૂ કરવા માટે એક વિશેષ કાઉન્સિલની નિમણૂક કરવામાં આવશે. પોલીસ કમિશનરે જણાવ્યું હતું કે આરોપી સગીર કાર ચલાવતો ન હતો તેવું બતાવવા માટે કેસમાં પુરાવા સાથે ચેડા કરવાનો પ્રયાસ કરવામાં આવ્યો હતો. પોલીસે આરોપીના પિતા, બાર માલિકો અને મેનેજર સામે નોંધાયેલી FIRમાં છેતરપિંડીનો કલમ 420 પણ ઉમેરી છે. કમિશનરે કહ્યું, 'અમારી પાસે પબમાં દારૂ પીતો સગીરના સીસીટીવી ફૂટેજ છે. આવી સ્થિતિમાં, અમે ફક્ત લોહીના નમૂનાના રિપોર્ટ પર નિર્ભર નહીં રહીએ. તેમજ આંતરિક તપાસમાં કેટલાક પોલીસકર્મીઓની ભુલ હોવાનું બહાર આવ્યું છે અને પુરાવાનો નાશ કરવા બદલ તેમની સામે કાર્યવાહી કરવામાં આવશે. આરોપીઓએ 90 મિનિટમાં 48 હજાર રૂપિયાનો દારૂ પીધો હતો
પુણેના પોલીસ કમિશનર અમિતેશ કુમારે જણાવ્યું હતું કે આરોપી 18 મેના રોજ રાત્રે 10:40 વાગ્યે કોજી પબમાં ગયો હતો. અહીં તેણે 90 મિનિટમાં 48 હજાર રૂપિયાનું બિલ ચૂકવ્યું હતું. આ પછી તે રાત્રે 12.10 વાગે બ્લેક ક્લબ મેરિયટ હોટેલ ગયો. અહીંથી નીકળ્યા બાદ રાત્રે 2 વાગે તેમની કારને અકસ્માત નડ્યો હતો. તે 200 કિલોમીટર પ્રતિ કલાકની ઝડપે કાર ચલાવી રહ્યો હતો. ACP મનોજ પાટીલે કહ્યું- આરોપીનું બ્લડ ટેસ્ટ કરવામાં આવ્યું છે. મોટર વાહન અધિનિયમની કલમ 185નો ચાર્જ - દારૂના નશામાં ડ્રાઇવિંગ એટલે કે ડ્રિંક એન્ડ ડ્રાઇવનો આરોપ FIRમાં ઉમેરવામાં આવ્યો છે. તેની સામે આઈપીસી કલમ 304 અને મોટર વ્હીકલ એક્ટની જોગવાઈઓ હેઠળ પણ કેસ નોંધવામાં આવ્યો છે. પુણેના પબ પર પ્રશાસનની કાર્યવાહી, કર્મચારીઓએ કર્યો વિરોધ આ ઘટના બાદ પુણે જિલ્લા પ્રશાસને શહેરમાં ચાલતા પબ સામે કાર્યવાહી શરૂ કરી છે. નિયમોનું ઉલ્લંઘન કરનારા 32 પબ સામે કાર્યવાહી કરવામાં આવી હતી. શુક્રવારે (24 મે), 2500 પબ-બારના કર્મચારીઓએ પૂણે સ્ટેશન નજીક રાજા બહાદુર મિલ્સ વિસ્તારમાં આ કાર્યવાહી વિરુદ્ધ પ્રદર્શન કર્યું હતું. વિરોધમાં ભાગ લેનારી મહિલાએ કહ્યું કે જે પબ નિયમોનું ઉલ્લંઘન કરી રહ્યા છે તેમની સામે કાર્યવાહી થવી જોઈએ, બધા વિરુદ્ધ નહીં. એક યુવકે કહ્યું કે બે પબની ભૂલનું પરિણામ અમારે ભોગવવું પડી રહ્યું છે. એક પબ માલિકે કહ્યું કે કોવિડ દરમિયાન અમે ઘણું સહન કર્યું હતું. હવે આ કાર્યવાહીથી વધુ નુકસાન થઈ રહ્યું છે.

આ પ્રકારના તમામ સમાચાર માટેે App ડાઉનલોડ કરો.