ઘોડી પાસાની કલબ ઝડપાઈ: નામચીન ઈબ્રાહીમ ઉર્ફે ઈભલો સહીત 8 ઝબ્બે

શહેરમાં જુગારની મોસમ ખીલી હોય તેમ પોલીસના ભય વગર બેફામ જુગાર કલબો ધમધમી રહી હોય તેવું સામે આવી રહ્યું છે. થોડાક દિવસો પહેલા શહેરના મધ્યમાં આવેલ શાસ્ત્રીમેદાન સામે એવરેસ્ટ બિલ્ડીંગમાંથી સ્થાનિક પોલીસે દરોડો પાડી મસમોટી ઘોડીપાસાની જુગાર કલબ ઝડપી નામીચા 25 શખ્સોને દબોચી લાખો રૂપિયાનો મુદામાલ કબ્જે કર્યો હતો ત્યારબાદ ક્રાઈમ બ્રાંચ અને એલસીબીની ટીમોએ અલગ અલગ સ્થળોએ દરોડા પાડી ત્રણથી વધુ કલબો ઝડપી પાડી હતી. ત્યારે ગઈકાલે રાત્રે નાનામવા રોડ પર જય ભીમનગર શેરીમાં બંધ બારણે ચાલતી ઘોડીપાસાની વધુ એક કલબમાં એલસીબીની ટીમે દરોડો પાડી નામચીન ઈબ્રાહીમ ઉર્ફે ઈભલો સહિત આઠ શખ્સોને દબોચી રૂા.42840નો મુદામાલ કબ્જે કર્યો હતો.
દરોડાની વિગત અનુસાર એલસીબી ઝોન-2ના પીએસઆઈ આર.એસ.ઝાલા ટીમ સાથે પેટ્રોલીંગમાં હતા ત્યારે સાથેના હેડકોન્સ્ટેબલ રાહુલ ગોહેલ તથા કોન્સ્ટેબલ જયપાલસિંહ સરવૈયાને નાનામવામાં આવેલ જય ભીમનગર શેરી નં.8માં રહેતા બાબુ લક્ષ્મણ વઘેરાના મકાનમાં જુગાર કલબ ચાલે છે તેવી મળેલ ચોકકસ બાતમીના આધારે ટીમે દરોડો પાડી ઘોડીપાસાનો જુગાર રમતા બાબુ લક્ષ્મણ વઘેરા, રહીમ હાસમ બાઉદીન રહે. સંજયનગર શેરી નં.1, જામનગર રોડ, ઈબ્રાહીમ ઉર્ફે ઈભલો કરીમ કાથરોટીયા રહે. ગણેશનગર શેરી નં.10, જુનો મોરબી રોડ,
ઈમરાન જમાલ બાવનકા રહે. ચામડીયાપરા, ખાટકીવાડ, અલ્પેશ રમણીક ગોટેચા, વિશ્વેશ્વર મંદિર પાછળ, મવડીરોડ, જાફર ઈકબાલ કીડીયા, સાંઢીયાપુલ પાસે, હુડકો કવાર્ટર, હુસેન અબુ કાલવા, બહારપરા, ખાટકીવાડ, અમરેલી અને દેવસી હરેશ પરમાર રહે. આંબેડકરનગર, કાલાવડ રોડ ને દબોચી રૂા.42840નો મુદામાલ કબ્જે કર્યો હતો. વધુમાં પોલીસે જણાવ્યા અનુસાર ઈબ્રાહીમ ઉર્ફે ઈભલા વિરુદ્ધ 50થી વધુ ગુના નોંધાયેલ છે તેમજ બાબુ વઘેરા, ઈમરાન બાવનકા અને અલ્પેશ ગોટેચા વિરુદ્ધ પણ અલગ અલગ પોલીસ મથકમાં ગુન્હાઓ નોંધાયેલા છે.

આ પ્રકારના તમામ સમાચાર માટેે App ડાઉનલોડ કરો.