શીતલપાર્ક પાસે રિક્ષાને હડફેટે લઈ કારચાલક ફરાર: દંપતી સહિત ચાર ઘાયલ

શીતલપાર્ક પાસે મોડીરાતે અજાણ્યાં કારચાલકે રિક્ષાને હડફેટે લેતાં રીક્ષા ચાલક સહિત તેની પત્ની, પુત્રી અને ભાણેજને ઇજા પહોંચતા સારવારમાં ખસેડાયા હતા. બનાવ અંગે અકસ્માત સર્જનાર અજાણ્યાં કારચાલક સામે ગાંધીગ્રામ પોલીસ મથકે ગુનો નોંધાયો હતો. બનાવ અંગે ગાયકવાડી શેરી નં.5 માં આવેલ કિટીપરામાં રહેતાં રાજુભાઈ વીઠ્ઠલભાઇ મકવાણા (ઉ.વ.50) એ નોંધાવેલ ફરિયાદમાં આરોપી તરીકે અજાણ્યાં કારચાલકનું નામ આપી જણાવ્યું હતું કે, તેઓ છકડો રીક્ષા ચલાવે છે.
તેમને સંતાનમાં ત્રણ પુત્રી, બે પુત્ર છે. ગઈકાલ સાંજના તેઓ તેની પત્ની જીતુબેન, નાની પુત્રી રિધ્ધી, મોટી પુત્રીનો પુત્ર સાથે રૈયાધાર મફતિયાપરામાં રહેતી મોટી દીકરી કાજલને ત્યાં તેની ખબર અંતર પૂછવા ગયેલ હતા. અને મોડીરાત્રીના સાડા બારેક વાગ્યાની આસપાસ ત્યાંથી છકડા રીક્ષામાં તેઓ પત્ની, નાની દીકરી તથા ભાણેજ મિતેષ સાથે ઘરે કીટીપરા જવા નીકળેલા હતા.
દરમિયાન શીતલપાર્ક સર્કલ ગોળાઇ ફરી શીતલ પાર્ક મેઇનરોડ તરફ જતી વખતે માધાપર ચોકડી તરફથી પુરપાટ ઝડપે આવેલ એક શિફ્ટ ડિઝાઇર કારના ચાલકે છકડો રીક્ષાને અડફેટે લેતા રીક્ષા પલ્ટી ખાઈ જતા તેઓને તેમજ પત્ની, પુત્રી અને ભણેજને ઇજા પહોંચતા 108 મારફતે સારવારમાં સિવિલ હોસ્પિટલમાં ખસેડવામાં આવ્યા હતાં. બનાવ અંગે ગાંધીગ્રામ પોલીસે અકસ્માત સર્જનાર અજાણ્યાં કારચાલક સામે ગુનો નોંધી શોધખોળ હાથ ધરી હતી.

આ પ્રકારના તમામ સમાચાર માટેે App ડાઉનલોડ કરો.