લોકમેળામાં 70 મોબાઇલ, 22 પાકીટ અને 10 વાહનની ચોરી : 65 વ્યકિત ગુમ થયા

શહેરના રેસકોર્ષ ગ્રાઉન્ડ ખાતે તા. 5-9 થી તા. 10-9 સુધી યોજાયેલ ‘રસરંગ લોકમેળા’માં મેળો માણવા આવેલા લોકોની સાથે સાથે ગઠીયાઓ પણ એટલા જ સક્રિય રહ્યા હતા અને છ દિવસના મેળામાં 70થી વધુ મોબાઇલ, 22 પાકીટ અને 10થી વધુ વાહનની ચોરી થયાનું સામે આવ્યું હતું. જયારે 65જેટલા લોકો ગુમ થયાની પણ કંટ્રોલ રૂમમાં ફરીયાદ આવતા પોલીસનો કાફલો દોડતો રહ્યો હતો અને 80 જેટલા આવારા તત્વોને રાઉન્ડઅપ પણ કર્યા હતા.
લોકમેળામાં કાર્યરત રહેલ કંટ્રોલ રૂમમાંથી જાણવા મળેલ વિગત મુજબ મેળાના છ દિવસમાં 70થી વધુ લોકોના મોબાઇલ ગુમ કે ચોરી થયા હોય તેમજ રર લોકોના પાકીટ અને 10થી વધુ વાહન ચોરીની ફરીયાદો મળી હતી. તેમજ 65થી વધુ વ્યકિત પરિવારોથી છુટા પડી ગુમ થયાની પણ ફરીયાદ મળી હતી.
લોકમેળામાં શહેર પોલીસ કમિશ્નર દ્વારા ચુસ્ત બંદોબસ્ત ગોઠવવામાં આવ્યો હતો. લોકમેળામાં વોચ ટાવર, ફલાઇંગ સ્કવોડ, પીક પોકેટીંગ ટીમ, એલસીબી, ડીસીબી પોલીસની અલગ અલગ ટીમો બનાવી આવારા તત્વો પર વોચ રાખવામાં આવેલ હતા. જેમાં પોલીસે 80થી વધુ શખ્સોને રાઉન્ડઅપ કરેલ હતા તેમજ 60થી વધુ ગુમ થયેલ લોકોને પરિવાર સાથે મીલન કરાવ્યું હતું.

આ પ્રકારના તમામ સમાચાર માટેે App ડાઉનલોડ કરો.