કલરકામ કરતી વેળાએ ઝુલો તૂટતાં યુવક બીજા માળેથી પટકાયો: મોત

શિવઆસ્થા સોસાયટીમાં મકાનમાં બીજા માળે કામ કરતી વેળાએ ઝુલો તૂટતાં અશ્વિન કોળી નામનો યુવકનું નીચે પટકાતા કમકમાટીભર્યું મોત નિપજતાં પરિવારમાં અરેરાટી વ્યાપી ગઈ હતી. પ્રાપ્ત વિગત અનુસાર, ગ્રીનલેન્ડ ચોકડી પાસે આવેલ લાલપરી મફતીયાપરામાં રહેતાં અશ્વિનભાઈ નરશીભાઇ તલસાણીયા (ઉ.વ.37) કલરકામ કરવાનું કામ કરતાં હતાં. અને ગતરોજ કારીગર સાથે મોરબી રોડ પર આવેલ શિવઆસ્થા સોસાયટીમાં આવેલ મકાનનું કલરકામ રાખેલ હોય ત્યાં કામે ગયાં હતાં. સાંજના તેઓ મકાનના બીજા માળે બહારની બાજુ ઝુલા પર કામ કરતાં હતાં ત્યારે ઝુલાનું દોરડું તૂટતાં નીચે પટકાયા હતાં. તેને શરીરે અને માથામાં ગંભીર ઇજા પહોંચતા સારવારમાં સિવિલ હોસ્પિટલમાં ખસેડવામાં આવ્યા હતા. પરંતુ સારવાર કારગત ન નિવડતાં તેનું મોત નીપજ્યું હતું. બનાવ અંગે સિવિલ ચોકીના સ્ટાફે બી.ડિવિઝન પોલીસને જાણ કરતાં સ્ટાફ દોડી આવ્યો હતો અને જરૂરી કાગળો કરી મૃતદેહને પીએમમાં ખસેડયો હતો.વધુમાં મૃતક ચાર ભાઈ બહેનમાં મોટા અને સંતાનમાં બે પુત્ર છે. બનાવથી પરિવારમાં આક્રંદ છવાયો હતો.

આ પ્રકારના તમામ સમાચાર માટેે App ડાઉનલોડ કરો.