નારણપુરાના શાસ્ત્રીનગરમાં બેફામ કાર ચલાવી સ્ટંટ કરતા યુવકે દહેશત ફેલાવી

અમદાવાદ,તા.17 ઓગષ્ટ 2022,બુધવારનારણપુરાના શાસ્ત્રીનગર વિસ્તારમાં રવિવારે મોડી રાત્રીના કાર પુરઝડપે હંકારી જોરથી બ્રેક મારી મોટા અવાજ કરી સ્ટંટ કરતા યુવકે દહેશત ફેલાવી હતી. સતત આ રીતે સ્ટંટ કરતા યુવકના નખરાથી હેરાન લોકો એકત્ર થતા આરોપી પુરઝડપે સ્વીફટ કાર ભગાવી ફરાર થઈ ગયો હતો.સ્થાનિકોના કહેવા મુજબ પોલીસ જીપ પણ સ્થળ પર પહોંચી હતી.જો કે, યુવક મળી આવ્યો ન હતો. રવિવારે મોડી રાત્રે સ્વીફ્ટ કાર ચાલકના નખરાથી હેરાન લોકો એકત્ર થતાં નશાખોર યુવક ફરાર થયો નારણપુરાના શાસ્ત્રીનગરમાં મોડી રાત્રે ધમધમતા રાત્રી બજારને કારણે લોકોની ખાસ્સી ભીડ જોવા મળતી હોય છે. રવિવારની રજા અને તહેવારના દિવસોને પગલે લોકોની ભીડ વચ્ચે સ્વીફટ કારમાં સવાર યુવકોએ સ્ટંટ શરૂ કર્યા હતા. બેફામ અને પુરઝડપે કાર ચલાવી અચાનક બ્રેક મારી ઉંચા અવાજ કરતા યુવક તરફ લોકોનું ધ્યાન ગયું હતું. આ યુવકે આ રીતે ચારથી પાંચ વખત સ્ટંટ કરીને લોકોમાં રીતસરની દહેશત ફેલાવી હતી. રસ્તે પસાર થતા વાહનચાલકો પણ અકસ્માતના ભયથી રોડની સાઈડમાં ઉભા રહી ગયા હતા. યુવકના નખરાથી હેરાન થયેલા લોકોના ટોળાંએ આરોપીને રોકવાનો નિર્ણય લીધો પરંતુ આરોપીની કારની સ્પીડ એટલી હતી કે, તે શક્ય ન હતું. લોકોએ બૂમો પાડી આરોપીને રોકવાનો પ્રયાસ કરતા નશાખોર યુવક સ્થળ પરથી કાર લઈને ફરાર થયા બાદ ફરી દેખાયો ન હતો. સ્થાનિકો સૂત્રોના જણાવ્યા મુજબ નશાખોર યુવકોની ટોળકી છાશવારે ઉંચા અવાજે ટેપ વગાડી કાર પુરઝડપે ભગાવી સ્ટંટ કરતા રહે છે. બનાવને પગલે સ્થાનિક પોલીસ દ્વારા આવા રોડ રોમિયો અને સ્ટંટ કરતા વાહનચાલકો પર કાર્યવાહી કરવામાં નહી આવે તો નજીકના ભવિષ્યમમાં મોટો અકસમાત કે ઘટના બનવાની શક્યતાઓ રહેલી છે. 

આ પ્રકારના તમામ સમાચાર માટેે App ડાઉનલોડ કરો.