એચ કે લક્ઝરી ટ્રાવેલ્સ બસની કેબિનમાં બેસેલ ત્રિપુટી પાસેથી દારૂની જથ્થો મળી આવ્યો

વડોદરા,તા.16 ઓગષ્ટ 2022,મંગળવારવડોદરા શહેરની દુમાડ ચોકડી નજીક સમા પોલીસે ચોક્કસ માહિતીના આધારે લક્ઝરીયસ દારૂની બોટલોની લક્ઝરીયસ બસમાં હેરાફેરી કરી રહેલ રાજસ્થાની ત્રિપુટીને ઝડપી પાડી દારૂની 30 બોટલો સાથે કુલ 6.31 લાખ ઉપરાંતનો મુદ્દામાલ કબજે કરી કાયદેસરની કાર્યવાહી હાથ ધરી છે. સમા પોલીસ મથકના જવાનો પેટ્રોલિંગમાં હતા. તે સમયે ચોક્કસ માહિતી મળી હતી કે, મુંબઈથી અમદાવાદ તરફ જતી એચ કે ટ્રાવેલ્સની બસની કેબિનમાં ભારતીય બનાવટના વિદેશી દારૂનો જથ્થો છે. જેના આધારે પોલીસે વોચ ગોઠવી દુમાડ ચોકડી નજીકથી બસને ઝડપી પાડી હતી. કેબિનમાં બેસેલ શખ્સોની પ્રાથમિક પૂછતાછ કરતા શંકરલાલ પટેલ ,મગન પટેલ અને દેવીલાલ પટેલ (ત્રણેવ રહે- રાજસ્થાન )હોવાનું બહાર આવ્યું હતું. કેબિનમાં રહેલી ત્રણ બેગોની ચકાસણી કરતા તેમાંથી રૂપિયા 14 હજારની કિંમતની દારૂની 30 નંગ બોટલો મળી આવી હતી . પોલીસે દારૂનો જથ્થો 6 લાખની કિંમત ધરાવતી બસ ,14 હજારની કિંમતના ત્રણ મોબાઇલ ફોન , 03 નંગ બેગ સહિત 06,31,375નો મુદ્દામાલ કબજે કર્યો હતો. પોલીસે આ દારૂનો જથ્થો આરોપીઓએ કોની પાસેથી મેળવ્યો ? અને કોને પહોંચાડવાનો હતો ? તે દિશામાં વધુ તપાસ અર્થે આરોપીઓના રિમાન્ડની તજવીઝ હાથ ધરી હોવાનું જાણવા મળ્યું છે. નોંધનીય છે કે, આરોપીઓ ગુનાહિત ભૂતકાળ ધરાવતા હોય અલગ અલગ પોલીસ મથકે તેઓની વિરુદ્ધ ગુના પણ નોંધાયા છે.

આ પ્રકારના તમામ સમાચાર માટેે App ડાઉનલોડ કરો.