લઠ્ઠાં કાંડ ઇફેક્ટ: રણોલીમા પીપડા ધોવાની આડમા ગેરકાયદે કેમિકલના જથ્થાની સંગ્રહખોરીનું ગોડાઉન ઝડપાયું

વડોદરા,તા.04 ઓગષ્ટ 2022,ગુરૂવારવડોદરા શહેરના ઉત્તર વિભાગમાં રણોલી ખાતે પીપડા ધોવાની આડમાં ધમધમતા કેમિકલ સંગ્રહખોરીના ગોડાઉન પર એલસીબી પોલીસે છાપો મારીને કૌભાંડ ઝડપી પાડ્યું હતું. વગર પરવાનગીએ ધમધમતા કેમિકલ સંગ્રહખોરીના ગોડાઉન અંગે જીપીસીબી દ્વારા વધુ તપાસ કરશે. તાજેતરના લઠ્ઠા કાંડ બાદ કેમિકલ ગોડાઉન પર પોલીસે નજર રાખવાનું શરૂ કર્યું છે. ઘટના સ્થળેથી પકડાયેલો તમામ મુદ્દામાલ જવાહર નગર પોલીસને સુપ્રત કરવાની કામગીરી પોલીસે શરૂ કરી છે. જ્યારે કેમિકલ ગોડાઉન ચલાવનારાઓની પોલીસે તપાસ આદરી છે.પોલીસ સૂત્રોએ જણાવેલી વિગત એવી છે કે તાજેતરમાં સર્જાયેલા લઠ્ઠાકાંડમાં અનેક નિર્દોષોએ જાન ગુમાવ્યા હતા. લઠ્ઠામાં ઝેરી કેમિકલ હોવાનું તપાસમાં ખુલ્યું હતું.જેથી રાજ્યભરની પોલીસ તમામ નાના-મોટા કેમિકલના ગોડાઉનો તથા વેપારીઓ શોધવા અંગે ચાંપતી નજર રાખી રહી છે.પરિણામે શહેરના ઉત્તર છેવાડે રણોલી  ખાતેના એક ગોડાઉનમાં પીપડા ધોવાની કાર્યવાહી ચાલે છે. આ વેપાર ધંધાની આડમાં ગોડાઉનની અંદર કેમિકલની ગેરકાયદે સંગ્રહખોરી થતી હોવાની જાણ એલસીબી પોલીસને પેટ્રોલિંગ દરમિયાન થઈ હતી.જેથી પીપડા ધોવાનુ  ગોડાઉન  શોધવા અંગે રણોલી ખાતે સઘન તપાસ પોલીસે શરૂ કરી હતી.તપાસ દરમિયાન પીપડા ધોવાની આડમાં કેમિકલની ગેરકાયદે સંગ્રહખોરી થતી હોવાનુ પોલીસને ગોડાઉનમાં તપાસ દરમિયાન જાણવા મળ્યું હતું.પરિણામે પોલીસે ઘટના સ્થળેથી કેમિકલના જથ્થા સહિત તમામ મુદ્દામાલ કબજે કરી જવાહર નગર પોલીસને સોંપવાની કાર્યવાહી આદરી .છે.સમગ્ર મામલે જાણ કરાતા જીપીસીબી દ્વારા વધુ તપાસ કરશે એમ પોલીસે જણાવ્યું હતું. ગોડાઉનમાં કેમિકલના જથ્થાની સંગ્રહખોરી કરનારાઓની પોલીસે તપાસ હાથ ધરી છે.

આ પ્રકારના તમામ સમાચાર માટેે App ડાઉનલોડ કરો.