જામનગર ખંભાળિયા ધોરી માર્ગ પર મેઘપર પાસેથી દારૂ સાથે નીકળેલા કાર ચાલકનો પોલીસે પીછો કરતાં ફિલ્મી દ્રશ્યો સર્જાયા

- કાર ચાલકે પોલીસથી બચવા યુ-ટર્ન લેવા જતાં ટ્રક સાથે અથડાયો: પગ ભાંગ્યો હોવાથી હોસ્પિટલમાં સારવાર હેઠળજામનગર તા 5 જુલાઈ 2022,મંગળવાર  જામનગર- ખંભાળિયા ધોરી માર્ગ પર મેઘપર નજીક દારૂ સાથે નીકળેલા એક કારચાલકનો પોલીસે પીછો કરતાં ફિલ્મી દ્રશ્યો સર્જાયા હતા. કાર ચાલકે એકાએક યું-ટર્ન મારીને ભાગવા જતાં એક ટ્રક ચાલક સાથે ટકરાઈ ગયો હોવાથી વાહનમાં નુકસાન થયું હતું, ઉપરાંત તેનો પગ ભાંગ્યો હતો. જે હાલ સારવાર હેઠળ છે. પોલીસે દારૂ સાથેની કાર કબજે કરી છે.આ દરોડા ની વિગત એવી છે કે જામનગર નજીક નાઘેડી માં રહેતો અને મૂળ ખંભાળિયા તાલુકાના પરોડિયા ગામ નો વતની કિસન ભરતભાઈ મસુરા નામનો શખ્સ કે જે કારમાં ઈંગ્લીશ દારૂનો જથ્થો લઈને નીકળી રહ્યો છે, તેવી બાતમી પોલીસને મળી હતી. જેથી મેઘપર ગામના પાટીયા પાસે પોલીસ દ્વારા વોચ રાખવામાં આવી હતી.જે દરમિયાન કારચાલક કિશન ગઢવી ત્યાંથી પસાર થતાં મેઘપર પોલીસે તેને રોકવાનો પ્રયત્ન કર્યો હતો. પરંતુ કારચાલક ઉભો રહ્યો ન હતો, અને તેણે પોતાની કાર હંકારી દીધી હતી. જેથી મેઘપર પોલીસે સરકારી જીપમાં દોઢ કિલોમીટર સુધી પીછો કર્યો હતો, અને ફિલ્મી દ્રશ્યો સર્જાયા હતા.દરમિયાન કિશન ગઢવીએ પોતાની કારને એકાએક યું-ટર્ન મારી પોલીસથી બચવા માટે ભાગવાની કોશિશ કરતાં સામેથી આવી રહેલા એક ટ્રક સાથે ટકરાઈ ગયો હતો, અને તેના વાહનમાં નુકસાન થયું હતું. એટલું જ માત્ર અહીં તેનો પગ ભાંગ્યો હતો, અને શરીરમાં ફ્રેકચર સહિતની ઇજાઓ થઈ હતી.જેથી પોલીસ દ્વારા તેને તાત્કાલિક અસરથી જામનગરની સરકારી જી.જી. હોસ્પિટલમાં ખસેડવામાં આવ્યો છે. જ્યાં તે હાલ સારવાર હેઠળ છે, અને તેના ઉપર પોલીસ પહેરો ગોઠવી દેવામાં આવ્યો છે.પોલીસે અકસ્માતગ્રસ્ત થયેલી કાર અને ૫૩ નંગ ઇંગ્લિશ દારૂની બાટલી નો જથ્થો કબજે કરી લીધો છે. જેની સામે મેઘપર પોલીસમાં દારૂબંધી ભંગ અંગેનો ગુનો નોંધવામાં આવ્યો છે.

આ પ્રકારના તમામ સમાચાર માટેે App ડાઉનલોડ કરો.