ગોમતીપુરમાં કુખ્યાત સહદેવનો આતંક: પાન પાર્લરમાં તલવારો સાથે ઘુસી તોડફોડ કરી ખંડણી માંગી

અમદાવાદ,તા.28 જુન 2022,મંગળવારગોમતીપુરમાં સહજાનંદ કોમ્પ્લેક્ષમાં આવેલા કબાના પાન પાર્લરમાં ઘુસી કુખ્યાત સહદેવ તોમર અને તેના સાગરીતોએ તલવારોના ફટકા મારી તોડફોડ મચાવી હતી.રવિવારે રાત્રે બનેલી ઘટના અંગે ગોમતીપુર પોલીસે ગુનો નોંધી તપાસ હાથ ધરી છે. પોલીસ ફરિયાદ મુજબ આરોપી પોતાના સાગરિતો સાથે દુકાનમાં ઘૂસ્યો અને વેપારીને ધમકી આપી કે, ધંધો કરવો હોય તો રોજના રૂ.500 આપવા પડશે. તેમ કહી વેપારીના હાથમાંથી રૂ.500ની નોટ લઈ તોડફોડ કરી હતી.સરસપુરમાં ફ્રુટવાળી ચાલીમાં રહેતો અને ગોમતીપુર સહજાનંદ કોમ્પ્લેક્ષમાં કબાના પાન પાર્લર ચલાવતા દિપકસિંહ તોમરે ગોમતીપુર પોલીસ સ્ટેશનમાં સહદેવ તોમર અને તેના સાગરિતો વિરૂધ્ધ ફરિયાદ કરી છે. જે સહદેવ તોમર અને તેના સાગરિતો રવિવારે રાત્રે ફરિયાદીની દુકાનમાં તલવાર અને ધારીયું લઈ ઘૂસ્યા હતા. આરોપીએ ફરિયાદીને તારે વેપાર કરવો હોય તો રોજના રૂ.500 મને આપવા પડશે નહી તો તને જાનથી મારી નાંખીશ. બાદમાં આરોપીઓએ તલવાર અને ધારીયાના ફટકા મારી દુકાનના કાચ તોડ્યા હતા. ફરિયાદીએ બુમાબુમ કરતા આરોપીઓ ત્યાંથી નીકળી ગયા તેમજ સ્થાનિક દુકાનદારો સ્થળ પર એકત્ર થયા હતાં. બનાવ અંગે પોલીસ કંટ્રોલને જાણ કરવામાં આવતા ગોમતીપુર પોલીસ સ્થળ પર પહોંચી હતી. પોલીસે ગુનો દાખલ કરી તપાસ હાથ ધરી હતી.

આ પ્રકારના તમામ સમાચાર માટેે App ડાઉનલોડ કરો.