ગાઝામાં 76 વર્ષીય નુસીરત શરણાર્થી કેમ્પ પર હુમલો:ઈઝરાયલે હવાઈ હુમલામાં શાળાને નિશાન બનાવી, મહિલાઓ અને બાળકો સહિત 32નાં મોત

હમાસ સામેના યુદ્ધની વચ્ચે ઈઝરાયલે સેન્ટ્રલ ગાઝામાં 76 વર્ષીય નુસીરાત રેફ્યુજી કેમ્પ પર હુમલો કર્યો. આ દરમિયાન એક શાળાને નિશાન બનાવવામાં આવી હતી. ફાઈટર જેટ દ્વારા કરવામાં આવેલા આ હવાઈ હુમલામાં 32 લોકોના મોત થયા છે. જેમાં મહિલાઓ અને બાળકોનો સમાવેશ થાય છે. જ્યારે હમાસના અલ-અક્સા મીડિયાએ જણાવ્યું કે હુમલામાં 39 લોકોએ જીવ ગુમાવ્યા. ઇઝરાયલના સંરક્ષણ દળ IDFએ આ હુમલાની પુષ્ટિ કરી છે. IDFએ દાવો કર્યો છે કે હમાસના નુખ્બા ફોર્સના લડવૈયાઓએ આ UNRWA શાળામાં આશ્રય લીધો હતો. ઈઝરાયલે તેને હવાઈ હુમલામાં નિશાન બનાવ્યો હતો. હકીકતમાં, ઇઝરાયલ અને હમાસ વચ્ચે યુદ્ધ શરૂ થયું ત્યારથી, 1 મિલિયનથી વધુ લોકો બેઘર બની ગયા છે. તેઓએ ગાઝામાં વિવિધ સ્થળોએ શાળાઓ અને હોસ્પિટલોમાં આશ્રય લીધો છે. ન્યૂઝ એજન્સી એપી અનુસાર, રેફ્યુજી કેમ્પ ગાઝા પટ્ટીની મધ્યમાં સ્થિત છે. 1948માં ઇઝરાયલની સ્થાપના પછી, લાખો પેલેસ્ટિનિયનોને બેઘર કરવામાં આવ્યા હતા. તેમને આશ્રય આપવા માટે નુસીરત કેમ્પ બનાવવામાં આવ્યો હતો. ઈઝરાયલનો દાવો- હુમલામાં નાગરિકોને બચાવવાનો પ્રયાસ કર્યો હતો
IDFએ દાવો કર્યો છે કે સ્કૂલ પર હુમલા પહેલા સંપૂર્ણ પ્લાનિંગ કરવામાં આવ્યું હતું. આ દરમિયાન ત્યાં હાજર સામાન્ય નાગરિકોને વધુ નુકસાન ન થાય તેનું ખાસ ધ્યાન રાખવામાં આવ્યું હતું. આ માટે વિસ્તારની હવાઈ દેખરેખ કરવામાં આવી હતી. આ ઉપરાંત, ત્યાં હાજર ઇઝરાયલના ગુપ્તચર સૂત્રો દ્વારા પણ માહિતી એકત્ર કરવામાં આવી હતી. ઈઝરાયલના હુમલા બાદ ગાઝામાં હાજર હમાસની આગેવાનીવાળી સરકારની મીડિયા ઓફિસે પણ એક નિવેદન બહાર પાડ્યું હતું. તેમણે શાળા પરના હુમલાને નરસંહાર ગણાવ્યો હતો. મીડિયા ઓફિસના પ્રવક્તા ઈસ્માઈલ અલ-થબતાએ જણાવ્યું કે ઘાયલોને અલ-અક્સા શહીદ હોસ્પિટલમાં દાખલ કરવામાં આવ્યા છે.

આ પ્રકારના તમામ સમાચાર માટેે App ડાઉનલોડ કરો.