ઈટાલીમાં 33 ભારતીયોને બચાવાયા, 2 આરોપીની ધરપકડ:ગુલામોની જેમ રાખ્યા, 10 કલાક કામ, પગાર પણ ન મળ્યો; ભાગવા પર મારી નાખવાની આપી હતી ધમકી

ઈટાલીમાં ગુલામોની જેમ કામ કરી રહેલા 33 ભારતીયોને મુક્ત કરવામાં આવ્યા છે. અમેરિકન મીડિયા સીએનએન અનુસાર, આ ભારતીયોને ઈટાલીના ખેતરોમાં દિવસમાં 10 કલાકથી વધુ કામ કરાવવામાં આવે છે. તેમને કોઈ રજા આપવામાં આવતી ન હતી અને ઘણી વખત તેમનો પગાર પણ રોકી દેવામાં આવતો હતો. ભારતીયોને ગુલામ બનાવી રાખવાના આરોપમાં ઈટાલિયન પોલીસે અન્ય બે ભારતીયોની ધરપકડ કરી છે. તેમની પાસેથી 4.17 કરોડ રૂપિયા પણ રિકવર કરવામાં આવ્યા છે. પોલીસને શંકા છે કે બંને આરોપીઓ ભારતીયોને સારા પગારની લાલચ આપીને ઈટાલી લઈ આવ્યા હતા. તેમની પાસેથી જે પૈસા વસૂલવામાં આવ્યા છે તે તેમને સસ્તા દરે મજૂર પૂરા પાડવા પર મળ્યા હતા. 15 લાખમાં નકલી વર્ક પરમિટ આપી
રિપોર્ટ અનુસાર, બચાવી લેવામાં આવેલા 33 ભારતીયોએ ઈટાલી જવા અને ત્યાં વર્ક પરમિટ મેળવવા માટે 15.45 લાખ રૂપિયા ચૂકવ્યા હતા. આમ છતાં તેમને આપવામાં આવેલી વર્ક પરમિટ નકલી હતી. પોલીસે કહ્યું કે અન્ય 11.78 કરોડ રૂપિયા કેટલાક ભારતીયો પાસેથી લેવામાં આવ્યા હતા. તેના બદલામાં તેમને કાયમી વર્ક પરમિટની લાલચ આપવામાં આવી હતી. સીએનએન અનુસાર, ભારતીય કામદારો ઇટાલીથી ભાગી ન જાય તે માટે, બંને આરોપીઓએ તેમના પાસપોર્ટ પણ છીનવી લીધા હતા. તેમને એક જૂના, જર્જરિત મકાનમાં રાખવામાં આવ્યા હતા. ઘરેથી ભાગી જવા પર જાનથી મારી નાખવાની ધમકી પણ આપવામાં આવી હતી. પોલીસે કહ્યું કે તેઓ આરોપીઓ અને ઈટાલીમાં સસ્તા દરે મજૂરી આપતી કંપનીઓને જોડવાનો પ્રયાસ કરી રહ્યા છે. ઈટાલીમાં ભારતીય દૂતાવાસે કહ્યું કે તેમને આ મામલાની માહિતી મળી છે. તેઓ ભારતીયોની સુરક્ષા માટે ઈટાલિયન અધિકારીઓ સાથે કામ કરી રહ્યા છે. ઈટાલીમાં ખેતરમાં કામ કરતા એક ભારતીયનું મોત થયું હતું
હકીકતમાં, ગયા મહિને ઈટાલીમાં ખેતરમાં કામ કરતા એક ભારતીયનું મૃત્યુ થયું હતું. ખેતરમાં ઘાસ કાપતી વખતે 30 વર્ષના સતનામનો હાથ મશીનથી કપાઈ ગયો હતો. આરોપ છે કે આ ઘટના બાદ તેની મદદ કરવાને બદલે તેના માલિકે તેને ઘરની નજીક રોડ કિનારે એકલો છોડી દીધો હતો. આ ઘટના બાદ પોલીસ એક્શનમાં આવી હતી. સતનામના માલિક સામે કેસ નોંધવામાં આવ્યો હતો. ભારતીય કામદાર સતનામના પરિવારજનોએ ઈટાલીના પ્રશાસન અને પીએમ મેલોનીને ન્યાયની અપીલ કરી હતી. ખેતરોમાં કામ કરતા ચોથા ભાગના લોકો માનવ તસ્કરીનો ભોગ
ઈટાલીમાં શ્રમ તસ્કરીના કિસ્સાઓ પહેલાથી જ પ્રકાશમાં આવી ચૂક્યા છે. 2018માં, ઈટાલિયન પોલીસે કહ્યું હતું કે દેશમાં ખેતરોમાં કામ કરતા એક ચતુર્થાંશ મજૂરો માનવ તસ્કરીનો ભોગ બનેલા છે. તેને એક ગેંગ દ્વારા ઓપરેટ કરવામાં આવે છે. સીએનએન અનુસાર, ઈટાલીમાં 11% કામદારો બ્લેક માર્કેટમાં કામ કરે છે. તેમનું કોઇ નોંધણી કરવામાં આવી નથી. આ તમામ કામદારો અને તેમના એમ્પ્લોયરો ટેક્સ પણ ચૂકવતા નથી, જે માનવ તસ્કરીને પ્રોત્સાહન આપે છે. જાન્યુઆરી 2023ના આંકડા મુજબ 1 લાખ 67 હજારથી વધુ ભારતીયો ઈટાલીમાં રહે છે. 2023માં અહીં 8 હજાર ભારતીય કામદારો હતા. અને 2025 સુધીમાં આ સંખ્યા 12 હજારને પાર કરી જશે. ગયા વર્ષે ડિસેમ્બરમાં ભારતે ઈટાલી સાથે માઈગ્રેશન એગ્રીમેન્ટ પાસ કર્યું હતું. આ અંતર્ગત ભારત દર વર્ષે 20 હજાર કામદારોને ઈટાલી મોકલશે.

આ પ્રકારના તમામ સમાચાર માટેે App ડાઉનલોડ કરો.