થોરાળામાંથી ચોરી કરેલ બાઈક લઈ સગીરે મહિલાના ગળામાંથી સોનાના ચેઈનની ચીલઝડપ કરી’તી

ત્રિવેણી ગેઈટની અંદરથી બાઈક સવાર મહિલાના ગળામાંથી સોનાના ચેઈનની ઝોંટ મારી નાસી છુટનાર સગીર આરોપીને એલસીબીની ટીમે દુધસાગર રોડ પરથી દબોચી લીધો હતો.
આરોપીએ થોરાળા વિસ્તારમાંથી ચોરી કરેલ બાઈક લઈ મહિલાના ગળામાંથી ઝોંટ મારી સોનાના દાગીનાની ચીલઝડપ કરી હતી.બનાવ અંગે પેડકરોડ ગુજરાત સોસાયટી મેઈન રોડ પર રહેતા મધુબેન સુભાષભાઈ સાવલીયા (ઉ.43)એ નોંધાવેલ ફરિયાદમાં જણાવ્યું હતું કે ગઈકાલે સવારે 11 વાગ્યાની આસપાસ તેઓ તેમના પતિ સાથે એકસેસમાં બેસી ઘર માટે ખરીદી કરવા ગુંદાવાડી બજારમાં ગયેલ હતા ત્યાંથી બારેક વાગ્યે ઘરે આવવા નીકળેલ અને સંતકબીર રોડ પર ત્રિવેણી ગેઈટ સામે આવેલ કપડાની દુકાનમાં ખરીદી કરેલ જયાંથી નીકળી ઘરે આવતા હતા.
ત્યારે ત્રિવેણી ગેઈટની અંદર હનુમાનજીની ડેરી પાસે પહોંચતા પાછળથી આવેલ સિંગલ સવારી બાઈક ચાલકે તેમની લગોલગ બાઈક ચલાવી તેમના ગળામાં પહેરેલ સોનાનો ચેઈન અને પેન્ડલની ઝોંટ મારી ઝુંટવી લઈ નાસી છુટયો હતો. જેથી રૂા.46 હજારના દાગીનાની ઝોંટ મારી નાસી છુટનાર અજાણ્યા શખ્સ વિરુદ્ધ ફરિયાદ નોંધાવી હતી.
બનાવ અંગેની ફરિયાદ પરથી એલસીબી ઝોન-1ના પીએસઆઈ બી.વી.બોરીસાગર ટીમ સાથે ગુન્હાનો ભેદ ઉકેલવા તપાસમાં હતા ત્યારે કોન્સ્ટેબલ હિતેષ પરમાર, સત્યજીતસિંહ જાડેજા અને રવીરાજ પટગીરને મળેલ ચોકકસ બાતમીના આધારે દુધસાગર રોડ પરથી એક સગીરને દબોચી તેમની પાસેથી ચોરાઉ બાઈક અને સોનાનો ચેઈન કબ્જે કર્યો હતો.
પોલીસ સૂત્રોએ જણાવ્યું હતું કે પંદરેક દિવસ પહેલા થોરાળા વિસ્તારમાંથી સગીરે બાઈકની ચોરી કર્યા બાદ મહિલાના ગળામાંથી ઝોંટ મારી સોનાનો ચેઈન તફડાવી નાસી છુટયો હતો.

આ પ્રકારના તમામ સમાચાર માટેે App ડાઉનલોડ કરો.