ઝીનત અમાને ફિલ્મ ‘ડાકુ હસીના’ની એક ઘટના કહી:કહ્યું, ‘હું શૂટિંગ દરમિયાન ગર્ભવતી થઈ ગઈ, બેબી બમ્પ છુપાવવા માટે ક્રૂએ તનતોડ મહેનત કરી’

ઝીનત અમાન 80ના દાયકાની લોકપ્રિય બોલિવૂડ એકટ્રેસ છે. તેમણે પોતાની કરિયરમાં ઘણી ફિલ્મોમાં કામ કર્યું છે, જેમાં 1987માં આવેલી ફિલ્મ 'ડાકુ હસીના'નો પણ સમાવેશ થાય છે. હાલમાં જ તેમની સોશિયલ મીડિયા પોસ્ટમાં ઝીનતે ખુલાસો કર્યો હતો કે તે આ ફિલ્મના શૂટિંગ દરમિયાન ગર્ભવતી હતી. ગર્ભાવસ્થા દરમિયાન શૂટિંગ કરવું મુશ્કેલ હતું: ઝીનત
ઝીનતે ફિલ્મ 'ડાકુ હસીના'નો પોતાનો એક ફોટો શેર કર્યો છે જેમાં તે બંદૂક સાથે બ્લેક આઉટફિટમાં જોવા મળે છે. તેમને શેર કરતા ઈન્સ્ટાગ્રામ પર લખ્યું હતું કે, 'ફિલ્મોમાંથી લાંબો બ્રેક લેતા પહેલાં મેં કરેલી આ છેલ્લી ફિલ્મો પૈકી એક હતી. હું શૂટિંગની શરૂઆતમાં જ ગર્ભવતી થઈ ગઈ હતી અને ફિલ્મનું શૂટિંગ પૂરું થયું ત્યાં સુધીમાં હું મારી પ્રેગ્નન્સીના ત્રીજા તબક્કામાં પહોંચી ગઈ હતી. મારું પરફેક્ટ ફિગર બગડી ગયું હતું અને ક્રૂએ ક્રિએટિવ શોટ્સ દ્વારા મારું પેટ છુપાવવાનો પ્રયાસ કર્યો હતો. ઝીનતે વધુમાં કહ્યું, 'ફિલ્મમાં કેટલાક એવા સીન હતા જેમાં મારે ઘોડેસવારી કરવાની હતી. આ કરતા પહેલાં હું ખૂબ ચિંતિત હતી. મને મારી સુરક્ષાની નહીં પણ ગર્ભમાં રહેલા બાળકની ચિંતા હતી. સદભાગ્યે, અમે કોઈપણ સમસ્યા વિના આ સીન શૂટ થયો હતો. ઝીનતે એ પણ જણાવ્યું કે તેના પતિ મઝહર ખાને પણ ફિલ્મમાં કેમિયો કર્યો હતો. ફિલ્મ 'ડાકુ હસીના'ના નિર્દેશક અશોક રોય હતા અને નિર્માતા રાજીવ કૌલ હતા. આ ફિલ્મ બોક્સ ઓફિસ પર ફ્લોપ સાબિત થઈ હતી. ઝીનતે બે વાર લગ્ન કર્યા હતા
ઝીનત અમાનની પર્સનલ લાઈફ વિશે વાત કરીએ તો મીડિયા રિપોર્ટ્સ અનુસાર, તેણે પહેલા 1978માં એક્ટર સંજય ખાન સાથે લગ્ન કર્યા હતા પરંતુ એક વર્ષ પછી આ સંબંધ તૂટી ગયો હતો. ત્યારબાદ ઝીનતે 1985માં અભિનેતા મઝહર ખાન સાથે લગ્ન કર્યા, જેની સાથે તે બે પુત્રો - અઝાન અને જહાનની માતા બની.

આ પ્રકારના તમામ સમાચાર માટેે App ડાઉનલોડ કરો.