ઢેબર રોડ પર શ્રી હરી ઈન્ડસ્ટ્રીઝમાંથી કારખાનેદાર દારૂની 312 બોટલ સાથે ઝડપાયા

ઢેબર રોડ પર આવેલ ખોડીયાર એસ્ટેટ વિસ્તારમાં શ્રી હરી ઈન્ડસ્ટ્રીઝમાંથી કારખાનેદાર જયેશ અમીપરા દારૂની 312 બોટલ સાથે ભકિતનગર પોલીસે દબોચી રૂા.97800નો મુદ્દામાલ કબ્જે કર્યો હતો.
દરોડાની વિગત મુજબ, ભકિતનગર પોલીસ મથકના પીઆઈ એમ.એમ. સરવૈયાની રાહબરીમાં પીએસઆઈ એન.એન. વસાવા ટીમ સાથે પેટ્રોલીંગમાં હતા ત્યારે કોન્સ્ટેબલ કરણ કોઠીવાળ અને રાજદિપસિંહ જાડેજાને મળેલ ચોકકસ બાતમીના આધારે ઢેબર રોડ પર ખોડીયાર એસ્ટેટ વિસ્તારમાં શ્રી હરી ઈન્ડસ્ટ્રીઝના નામના કારખાનામાં દારૂ છુપાવેલ હોવાની માહીતીના આધારે દરોડો પાડી કારખાનાની અંદર અઢી ફુટના નવેરામાં છુપાવેલ દારૂની 14 પેટી કબ્જે કરી તપાસ કરતા તેમાંથી દારૂની 312 બોટલ મળી આવી હતી. પોલીસે કારખાનેદાર જયેશ ભીખા અમીપરા (ઉ.વ.31) (રહે. સેટેલાઈટ સોપાન સોસાયટી, શેરી નં.2, માધવ ગેઈટ તપોવન સ્કુલ પાછળ, 150 ફુટ રીંગ રોડ)ને દબોચી દારૂની 330 બોટલ રૂા.97800નો મુદ્દામાલ કબ્જે કરી દારૂ કયાંથી લાવ્યો અને કોને સપ્લાય કરવાનો હતો તે અંગે પુછપરછ હાથ ધરી હતી.

આ પ્રકારના તમામ સમાચાર માટેે App ડાઉનલોડ કરો.