ડીએચ કોલેજ પાસે શ્રમીકને આંતરી ત્રણ શખ્સો રોકડ અને દાગીના મળી રૂા.13500ની લુંટ ચલાવી નાસી છુટયા

ડીએચ કોલેજ પાસે વહેલી સવારમાં બાઈક સવાર શ્રમિકને આંતરી બાઈકમાં આવેલા અજાણ્યા શખ્સો છરીની અણીએ રૂા.13500ના મુદામાલની લુંટ ચલાવી નાસી છુટતા પોલીસે લુંટારુઓનું પગેરુ મેળવવા તપાસનો ધમધમાટ આદર્યો હતો.
પ્રાપ્ત વિગત મુજબ વાગુદડમાં રહેતા અને ખેતીકામ કરતા માનસીંગભાઈ કાળુભાઈ ઘોડ (ઉ.55) ગઈ રાત્રે સીવીલ હોસ્પીટલમાં પોતાના પરિચીત દાખલ હોય જેમની ખબર અંતર પુછવા માટે આવ્યા હતા.
બાદમાં તેઓ વહેલી સવારે સાડા ચાર વાગ્યાની આસપાસ કામ અર્થે પોતાની બાઈક લઈ શહેરમાં નીકળ્યા હતા દરમ્યાન તેઓ યાજ્ઞીકરોડ પરથી ડીએચ કોલેજમાં આવેલ લો કોલેજ તરફના રસ્તા તરફ જતા હતા ત્યારે અચાનક જ એક બાઈકમાં ત્રણ શખ્સો ધસી આવ્યા હતા અને પોતાની બાઈકને આંતરી છરી બતાવી પોતાની પાસે રહેલ રોકડ સહિતનો મુદામાલ આપવા માટે જણાવ્યું હતું.
માનસીંગભાઈએ લુંટારુઓનો પ્રતિકાર કરતા ત્રણેય શખ્સો ઉશ્કેરાયા હતા અને છરી બતાવી તેની પાસે રહેલ રોકડા રૂપિયા 1500 અને સોનાની બે કડી મળી રૂા.13500નો મુદામાલ લુંટી નાસી છુટયા હતા. બાદમાં લુંટનો ભોગ બનેલા પ્રૌઢ પોલીસ મથકે પહોંચ્યા હતા. બનાવ અંગેની ફરિયાદ પરથી એ ડીવીઝન પોલીસે ગુન્હો નોંધી લુંટારુઓને પકડવા સીસીટીવી ફુટેજના આધારે ચક્રો ગતિમાન કર્યા હતા.

આ પ્રકારના તમામ સમાચાર માટેે App ડાઉનલોડ કરો.