ઇસ્કોન મંદિર પાસેની સોસાયટીમાં આવારા તત્વોનો આતંક: યુવાન ને ઢોરમાર માર્યો

ઇસ્કોન મંદિર પાસે ઓન હાઉસીંગ સોસાયટીમાં સેફુ મેમણ સહિતના આવારા તત્વોએ આતંક મચાવી વિદ્યાર્થીને ઢોર માર મારતા સારવારમાં સીવીલ હોસ્પીટલમાં ખસેડવામાં આવ્યો હતો. સોસાયટીના રહેવાસીઓએ નામચીન શખ્સો અવાર-નવાર હેરાન કરતાં હોવાનો આક્ષેપ પણ કર્યો હતો. બનાવ અંગે યુનિ. પોલીસે ગુનો નોંધી તપાસ હાથ ધરી હતી.
પ્રાપ્ત વિગત મુજબ કાલાવડ રોડ પર ઇસ્કોન મંદિર પાસે ઓન હાઉસીંગ સોસાયટીમાં રહેતો હર્ષ દિલીપભાઇ ગોસ્વામી તેના ઘર પાસે મિત્રો સાથે બેઠો હતો ત્યારે ધસી આવેલા સેફુ મેમણ સહિતના શખ્સોએ ગાળો આપી ઢીકાપાટુનો માર મારતા શરીરે ઇજા પહોંચી હતી. યુવાનને ઇજાગ્રસ્ત હાલતમાં સારવારમાં સીવીલ હોસ્પીટલમાં ખસેડવામાં આવ્યો હતો. બનાવ અંગે સીવીલ ચોકીના સ્ટાફે જાણ કરતા યુનિ. પોલીસે યુવકનું નિવેદન નોંધી ગુનો નોંધ્યો હતો.
વધુમાં ઓન હાઉસીંગ સોસાયટીમાં રહેતા હરદેવસિંહ જાડેજાએ જણાવ્યું હતું કે આવારા તત્વો દારુ-ડ્રગ્સના ધંધા કરે છે. સોસાયટીમાં બેફામ વાહનો ચલાવી બહેન-દિકરીઓની છેડતી કરે છે અને પોલીસ પણ આ બાબતે ધ્યાન ન આપતી હોવાનો આક્ષેપ કર્યો હતો.

આ પ્રકારના તમામ સમાચાર માટેે App ડાઉનલોડ કરો.