ટ્રમ્પને મારવા આવ્યાના આરોપમાં પાકિસ્તાનીની ધરપકડ:દાવો- ઈરાને સોપારી આપી, સુલેમાનીની હત્યાનો બદલો લેવા માગે છે

અમેરિકામાં જસ્ટિસ ડિપાર્ટમેન્ટે ઈરાન સાથે સંકળાયેલા એક પાકિસ્તાની વ્યક્તિની અમેરિકન નેતાઓની હત્યાનું કાવતરું ઘડવાના આરોપમાં અટકાયત કરી છે. તેને ટ્રમ્પ સાથે પણ જોડવામાં આવી રહી છે. CNNએ કોર્ટના દસ્તાવેજોને ટાંકીને જણાવ્યું હતું કે 46 વર્ષીય આસિફ મર્ચન્ટે 2020માં ઈરાનના રિવોલ્યુશનરી ગાર્ડ્સના ટોચના કમાન્ડર કાસિમ સુલેમાનીની હત્યાનો બદલો લેવા માટે અમેરિકન નેતાઓની હત્યાનું કાવતરું ઘડ્યું હતું. મર્ચન્ટ વિશે એવો દાવો કરવામાં આવ્યો છે કે તે અમેરિકા જતા પહેલા ઘણા દિવસો સુધી ઈરાનમાં રહ્યો હતો. તે પોતાની યોજનાને અંજામ આપવા માટે આ વર્ષે એપ્રિલમાં પાકિસ્તાનથી અમેરિકા પહોંચ્યો હતો. અહીં પહોંચ્યા બાદ તેણે ન્યૂયોર્કમાં એક કિલરને હાયર કરવાનો પ્રયાસ કર્યો હતો. એક અજાણ્યા વ્યક્તિએ મર્ચન્ટ વિશે પોલીસને જાણ કરી, જે પછી પોલીસે તેને કસ્ટડીમાં લીધો. યુએસ ફેડરલ કોર્ટે 16 જુલાઈએ તેની ધરપકડનો આદેશ આપ્યો હતો. FBIએ મર્ચન્ટનું ઈરાન સાથે કનેક્શન જાહેર કર્યું
બીબીસી અનુસાર, એફબીઆઈ ડાયરેક્ટર ક્રિસ્ટોફર રેએ કહ્યું કે મર્ચન્ટ એક ખતરનાક હત્યાની યોજના બનાવી રહ્યો હતો, જેને નિષ્ફળ કરવામાં આવ્યો. રેએ કહ્યું કે મર્ચન્ટ ઈરાન સાથે સીધો સંબંધ ધરાવે છે. ઈરાને જ તેને અમેરિકન નેતાઓની હત્યા કરવા મોકલ્યો હતો. રિપોર્ટ અનુસાર, કોર્ટના દસ્તાવેજોમાં એ વાતનો ઉલ્લેખ નથી કે કોની હત્યાનું નિષ્ફળ ષડયંત્ર રચવામાં આવ્યું હતું, પરંતુ અમેરિકી અધિકારીઓ તેને ટ્રમ્પ સાથે જોડી રહ્યા છે. આ માહિતી સામે આવ્યા બાદ અમેરિકી સરકારે પૂર્વ રાષ્ટ્રપતિ ડોનાલ્ડ ટ્રમ્પ અને અન્ય અધિકારીઓની સુરક્ષા વધારી દીધી છે. રિપોર્ટમાં દાવો- ઈરાન ટ્રમ્પની હત્યાનું કાવતરું ઘડી રહ્યું છે
13 જુલાઈના રોજ પેન્સિલવેનિયાના બટલર શહેરમાં એક રેલીને સંબોધિત કરતી વખતે ટ્રમ્પ પર હુમલો કરવામાં આવ્યો હતો. આ પછી, સીએનએનના અહેવાલમાં દાવો કરવામાં આવ્યો હતો કે પૂર્વ અમેરિકી રાષ્ટ્રપતિની હત્યા માટે ઈરાનમાં ષડયંત્ર રચવામાં આવી રહ્યું છે. જો કે, ટ્રમ્પ પરના હુમલાનો ઈરાન સાથે કોઈ સંબંધ છે કે કેમ તે અંગેની માહિતી હજુ સામે આવી નથી. જો કે, આ પછી ટ્રમ્પે કહ્યું હતું કે જો ઈરાન ક્યારેય તેમને મારવામાં સફળ થાય છે, તો તેમને આશા છે કે અમેરિકા તેમને ખતમ કરી દેશે. તે વિશ્વના નકશા પરથી ભૂંસાઈ જશે. ઈરાને સુલેમાનીના મોતનો બદલો લેવાની ધમકી આપી છે
ઈરાને ગયા વર્ષે પણ અમેરિકાના પૂર્વ રાષ્ટ્રપતિ ટ્રમ્પને મારી નાખવાની ધમકી ​​​​​​​આપી હતી. ઈરાનના રિવોલ્યુશનરી ગાર્ડ એરોસ્પેસ ફોર્સના વડા અમિરાલી હાજીઝાદેહે કહ્યું હતું કે જો ભગવાન ઈચ્છશે તો અમે ટ્રમ્પને ચોક્કસ મારીશું. અમે તે તમામ સૈન્ય કમાન્ડરોને મારી નાખવા માંગીએ છીએ જેઓ ઈરાનના સૈન્ય કમાન્ડર કાસિમ સુલેમાનીની હત્યામાં સામેલ હતા. હકીકતમાં, 3 જાન્યુઆરી, 2020એ તત્કાલિન અમેરિકી રાષ્ટ્રપતિ ડોનાલ્ડ ટ્રમ્પના આદેશ પર, તેમની સેના અને સીઆઈએએ મળીને ઈરાની સ્પેશિયલ ફોર્સના વડા જનરલ કાસિમ સુલેમાનીની હત્યા કરી હતી. જનરલ કાસિમ ઈરાક અને સીરિયામાં આતંકવાદી સંગઠન ઈસ્લામિક સ્ટેટ સામે લડવા માટે પ્રખ્યાત હતા. 2019માં જ્યારે અમેરિકી રાષ્ટ્રપતિ ટ્રમ્પે પરમાણુ કરાર તોડવા માટે ઈરાનને વિનાશની ધમકી આપી હતી, ત્યારે જનરલ કાસિમે કહ્યું હતું કે જો ટ્રમ્પ યુદ્ધ શરૂ કરશે, તો અમે તેને સમાપ્ત કરીશું. સુલેમાનીના મોત બાદ ઈરાને 7-8 જાન્યુઆરી 2020ના રોજ બગદાદમાં યુએસ એમ્બેસી પર પણ હુમલો કર્યો હતો. તેણે અમેરિકન સૈન્ય મથકો પર 22 મિસાઇલો છોડી હતી. ઈરાને દાવો કર્યો હતો કે આ હુમલામાં 80 અમેરિકન સૈનિકો માર્યા ગયા હતા.

આ પ્રકારના તમામ સમાચાર માટેે App ડાઉનલોડ કરો.