ફ્રાન્સમાં રાષ્ટ્રપતિ મેક્રોને સંસદ ભંગ કરી:યુરોપિયન યુનિયનની ચૂંટણીમાં હારને ધ્યાનમાં રાખીને નિર્ણય લીધો; આ મહિને ચૂંટણી યોજાશે

ફ્રાન્સમાં રાષ્ટ્રપતિ ઈમેન્યુઅલ મેક્રોને ચોંકાવનારું પગલું ભર્યું છે અને નેશનલ એસેમ્બલીનું વિસર્જન કર્યું છે. CNNના અહેવાલ મુજબ, તેમણે યુરોપિયન સંસદની ચૂંટણીમાં પાર્ટીની મોટી હાર જોયા બાદ આ નિર્ણય લીધો છે. એક્ઝિટ પોલ્સ અનુસાર, રવિવારે યોજાયેલી યુરોપિયન સંસદીય ચૂંટણીમાં મેક્રોનની રિનેસાં પાર્ટી મરીન લે પેનની દક્ષિણપંથી પાર્ટી નેશનલ રેલી સામે હારી રહી છે. એક્ઝિટ પોલના અંદાજ મુજબ, નેશનલ રેલીને 31.50% વોટ મળી રહ્યા છે જ્યારે રિનેસાં પાર્ટીને માત્ર 15.20% વોટ મળી રહ્યા છે. સોશિયાલિસ્ટ પાર્ટી 14.3% મતો સાથે ત્રીજા સ્થાને રહી શકે છે. ફ્રાન્સમાં ચૂંટણીની જાહેરાત કરવામાં આવી છે. 30 જૂન અને 7 જુલાઈએ મતદાન થશે. એક્ઝિટ પોલ બહાર આવ્યા પછી, નેશનલ રેલીના નેતા જોર્ડન બાર્ડેલાએ મેક્રોનને સંસદ ભંગ કરવાની હાકલ કરી હતી. એક્ઝિટ પોલ આવ્યાના થોડા કલાકો બાદ જ મેક્રોને રાષ્ટ્રીય સંબોધનમાં સંસદ ભંગ કરવાની જાહેરાત કરી હતી. "આ પરિણામો સરકાર માટે વિનાશક છે, હું તેને અવગણી શકતો નથી. મેં સંસદ ભંગ કરી દીધી છે. હવે તમારી પાસે તમારું રાજકીય ભવિષ્ય પસંદ કરવાનો વિકલ્પ છે. મને ખાતરી છે કે તમે સાચો નિર્ણય લેશો.” ફ્રાન્સની નેશનલ એસેમ્બલીમાં 577 સભ્યો હોય છે. ત્યાં રાષ્ટ્રપતિ પદ માટે અલગથી ચૂંટણી યોજાય છે. આવી સ્થિતિમાં જો મેક્રોનની પાર્ટી હારશે તો પણ મેક્રોન પદ પર રહેશે. જો કે, જો મરીન લે પેનની નેશનલ રેલી (RN) નેશનલ એસેમ્બલીમાં બહુમતી જીતી લે છે, તો મેક્રોન ખૂબ નબળા રાષ્ટ્રપતિ બની જશે અને સંસદમાં મહત્વપૂર્ણ નિર્ણયો લેવા માટે વિપક્ષી પાર્ટીઓ પર આધાર રાખવો પડશે. ફ્રાન્સમાં રાષ્ટ્રપતિની ચૂંટણી પ્રક્રિયા અન્ય દેશો કરતા અલગ છે
ફ્રાન્સમાં એપ્રિલ 2022માં રાષ્ટ્રપતિની ચૂંટણી યોજાઈ હતી. જેમાં બીજા તબક્કાના મતદાનમાં ઈમેન્યુઅલ મેક્રોનનો વિજય થયો હતો. ફ્રાન્સમાં, જો પ્રથમ તબક્કાના મતદાનમાં કોઈને 50% મત ન મળે તો બીજા તબક્કાનું મતદાન થાય છે. બીજા તબક્કાના મતદાનમાં મેક્રોનને 58.5 ટકા મત મળ્યા હતા. જ્યારે મરીન લે પેનને 41.5% વોટ મળ્યા હતા. ફ્રાન્સના ઈતિહાસમાં એવું ક્યારેય બન્યું નથી કે કોઈ ઉમેદવાર પ્રથમ તબક્કામાં 50% મત મેળવીને રાષ્ટ્રપતિ બન્યા હોય.

આ પ્રકારના તમામ સમાચાર માટેે App ડાઉનલોડ કરો.