ચેન્નઈમાં પુણે પોર્શ કાર જેવો કાંડ!:નશામાં ધૂત રાજ્યસભા સાંસદની દીકરીએ એક યુવકને કચડ્યો, પોલીસ સ્ટેશનમાંથી જ જામીન મળ્યા

પુણે પોર્શ કાર કેસ બાદ ચેન્નાઈમાં વધુ એક હાઈપ્રોફાઈલ હિટ એન્ડ રન કેસ સામે આવ્યો છે. ચેન્નાઈમાં, રાજ્યસભાના સાંસદની દીકરીએ ફૂટપાથ પર સૂઈ રહેલા એક વ્યક્તિ પર તેની BMW કાર ચલાવી. જેમાં તે વ્યક્તિનું મોત થયું છે. અકસ્માત બાદ સાંસદની પુત્રીને પોલીસ સ્ટેશનમાંથી જ જામીન મળી ગયા હતા. આ ઘટના સોમવારે (17 જૂન) રાત્રે બની હતી. આરોપીની ઓળખ YSR કોંગ્રેસ પાર્ટીના રાજ્યસભા સાંસદ બીડા મસ્તાન રાવની પુત્રી માધુરી તરીકે થઈ છે. મૃતકની ઓળખ 24 વર્ષીય સૂર્યા તરીકે થઈ છે. તે પેઇન્ટિંગનું કામ કરતો હતો. તેના લગ્ન આઠ મહિના પહેલા જ થયા હતા. એનડીટીવીના અહેવાલ મુજબ માધુરી અકસ્માત સમયે નશામાં હતી. તે કાર ચલાવી રહી હતી. કારમાં તેની એક મહિલા મિત્ર પણ હાજર હતી. ચેન્નાઈના બેસંત નગરમાં માધુરીએ ફૂટપાથ પર સૂઈ રહેલા યુવક પર કાર ચલાવી હતી. અકસ્માત બાદ માધુરી ત્યાંથી ભાગી ગઈ હતી, જ્યારે તેની મિત્ર કારમાંથી નીચે ઉતરી અને અકસ્માત બાદ એકઠા થયેલા લોકો સાથે દલીલ કરવા લાગી હતી. થોડા સમય પછી તે પણ ભાગી ગઈ. BMW કાર બિડા મસ્તાન રાવ ગ્રુપના નામે રજીસ્ટર્ડ છે
ભીડમાંથી કેટલાક લોકો ઘાયલ યુવકને હોસ્પિટલ લઈ ગયા, પરંતુ તેનું મોત થઈ ગયું. જ્યારે પોલીસે સીસીટીવી ફૂટેજની તપાસ કરી તો જાણવા મળ્યું કે આ કાર BMR (બીડા મસ્તાન રાવ) ગ્રુપની છે અને તે પુડુચેરીમાં નોંધાયેલી છે. આ પછી પોલીસે માધુરીની ધરપકડ કરી હતી, પરંતુ તેને પોલીસ સ્ટેશનમાંથી જ જામીન મળી ગયા હતા. મૃતકના સંબંધીઓ અને કોલોનીના લોકો જે-5 શાસ્ત્રીનગર પોલીસ સ્ટેશનમાં એકઠા થયા હતા અને આરોપીઓ સામે કાર્યવાહીની માગ કરી હતી. એક દાવો એવો પણ છે- મહિલા અને તેની મિત્રએ એમ્બ્યુલન્સને બોલાવી
ઈન્ડિયા ટુડેએ ચેન્નાઈ પોલીસ અધિકારીઓને ટાંકીને કહ્યું કે આ ઘટનાનો એક વીડિયો સામે આવ્યો છે, જેમાં માધુરીની મિત્ર ઘટનાસ્થળે એકઠા થયેલા લોકો સાથે દલીલ કરતી જોવા મળે છે. તેને એમ કહેતા સાંભળવામાં આવી કે તેણે યુવકને હોસ્પિટલ લઈ જવા માટે એમ્બ્યુલન્સ બોલાવી હતી. પોલીસે સાંસદની દીકરી અને તેની મિત્રને તે મોબાઈલ નંબર દ્વારા ટ્રેક કર્યા, જેનાથી તેમને એમ્બ્યુલન્સ માટે ફોન આવ્યો હતો. કોણ છે સાંસદ બીડા મસ્તાન રાવ? બીડા મસ્તાન રાવ આંધ્ર પ્રદેશના નેતા અને મોટા ઉદ્યોગપતિ છે. ચૂંટણી એફિડેવિટ અનુસાર, તેઓ 165 કરોડ રૂપિયાથી વધુની સંપત્તિના માલિક છે. બીડા મસ્તાનની કંપની બીએમઆર ગ્રુપ સીફૂડ ઉદ્યોગમાં જાણીતું નામ છે. બીડા મસ્તાન રાવ 2009 થી 2019 સુધી ટીડીપીમાં હતા. આ સમયગાળા દરમિયાન, તેઓ 2009 થી 2014 સુધી આંધ્ર પ્રદેશની કાવલી સીટથી ધારાસભ્ય હતા. તેઓ 2019માં YSRCPમાં જોડાયા હતા. તેઓ 2022માં YSRCP તરફથી રાજ્યસભાના સાંસદ બન્યા હતા.

આ પ્રકારના તમામ સમાચાર માટેે App ડાઉનલોડ કરો.