શિવધામ સોસાયટી પાસેથી કુખ્યાત સુરજ ગઢવી દારૂની 144 બોટલો સાથે ઝડપાયો

કોઠારીયા રોડ પર આવેલ શિવધામ સોસાયટી પાસેથી હીસ્ટ્રીશીટર સુરજ ગઢવી સ્કોર્પીયો કારમાં દારૂની સપ્લાય કરે તે પહેલા જ એલસીબી ઝોન-1ની ટીમે દબોચી દારૂની 144 બોટલ અને કાર મળી રૂા.10.52 લાખનો મુદ્દામાલ કબ્જે કર્યો હતો. જયારે સપ્લાયર તરીકે આજીડેમના કચ્છાનું નામ ખુલતા તેની શોધખોળ હાથ ધરી હતી.
દરોડાની વિગત મુજબ એલસીબી ઝોન-1ના પીએસઆઈ ડી.વી. બોરીસાગર ટીમ સાથે પેટ્રોલીંગમાં હતા ત્યારે સાથેના હે.કો. મનરૂપગીરી ગોસ્વામી અને કોન્સ. હીતેષ પરમારને મળેલ ચોકકસ બાતમીના આધારે કોઠારીયા રોડ, શિવધામ સોસાયટી પાસેથી પસાર થતી સ્કોર્પીયો કાર નં. જીજે 3 એનએફ 0087ને અટકાવી તપાસ કરતા કારમાંથી અલગ અલગ બ્રાન્ડની દારૂની 144 બોટલ મળી આવતા કાર ચાલક સુરજ જબર કુનડા (ઉ.27) (રહે.શિવધામ સોસાયટી શેરી નં.2, રણુજા મંદિર પાસે)ની ધરપકડ કરી દારૂ અને કાર મળી રૂા.10.52 લાખનો મુદ્દામાલ કબ્જે કર્યો હતો.
પોલીસ સુત્રોએ વધુમાં જણાવ્યું હતું કે સુરજ ગઢવી આજીડેમ વિસ્તારના કચ્છા નામના બુટલેગર પાસેથી દારૂ લઈ આવ્યો હતો. ઉલ્લેખનીય છે કે સુરજ ગઢવી વિરૂધ્ધ અલગ અલગ પોલીસ મથકમાં હત્યાનો પ્રયાસ, મારામારી, દારૂ સહિતના અનેક ગુના નોંધાયેલ છે.

આ પ્રકારના તમામ સમાચાર માટેે App ડાઉનલોડ કરો.