34 વર્ષનો થયો ઇશાંત શર્મા, ‘ટેસ્ટમાં અંગ્રેજોને કર્યા હતા ચકિત

નવી દિલ્હીઃ અનુભવી ભારતીય ફાસ્ટ બોલર ઈશાંત શર્મા આજે પોતાનો 34મો જન્મદિવસ ઉજવી રહ્યો છે. ઇશાંત ટેસ્ટ મેચોમાં ભારત માટે મેચ વિનર રહ્યો છે. પોતાની આંતરરાષ્ટ્રીય ક્રિકેટ કારકિર્દીમાં આ બોલરે લગભગ 70 ટકા વિકેટ માત્ર ટેસ્ટ મેચમાં જ લીધી છે. ભારતીય બોલરના નામે કુલ 434 વિકેટનો રેકોર્ડ છે. દિલ્હીના આ બોલરે 104 ટેસ્ટ મેચમાં 311 વિકેટ લીધી છે. તે જ સમયે, ઈશાંતે ODI કારકિર્દીમાં 115 અને T20માં માત્ર 8 વિકેટ ઝડપી છે. ટેસ્ટ મેચોમાં ભારત તરફથી સૌથી વધુ વિકેટ લેવાના મામલે ઈશાંત 5માં નંબર પર છે.

ઝહીર ખાનની નિવૃત્તિ બાદ ઈશાંતે ટેસ્ટ મેચોમાં પણ ભારતનું નેતૃત્વ કર્યું હતું. ઈશાંતના જન્મદિવસના અવસર પર બીસીસીઆઈએ તેના ટ્વિટર એકાઉન્ટ પર તેને શુભેચ્છા પાઠવી છે. બીસીસીઆઈએ એક ટ્વિટમાં લખ્યું, "199 ઈન્ટરનેશનલ મેચોમાં 434 ઈન્ટરનેશનલ વિકેટ અને 2013 આઈસીસી ચેમ્પિયન્સ ટ્રોફીનો વિજેતા. ટીમ ઈન્ડિયાના ઝડપી બોલર ઈશાંત શર્માને જન્મદિવસની શુભકામનાઓ.

ઈશાંતે 2013ની ચેમ્પિયન્સ ટ્રોફીમાં મહત્વની ભૂમિકા ભજવી હતી. તેણે ટૂર્નામેન્ટમાં 5 મેચમાં 10 વિકેટ લીધી હતી. ભારત અને ઈંગ્લેન્ડ વચ્ચે રમાઈ રહેલી ફાઈનલ મેચમાં ઈશાંતે 18મી ઓવરમાં ઈયોન મોર્ગન અને રવિ બોપારાને આઉટ કરીને મેચનું પાસુ પલટી દીધો હતો.

2014માં ભારતના ઈંગ્લેન્ડ પ્રવાસમાં 319 રનનો પીછો કરતા યજમાન ટીમ જીતવા માટે તૈયાર દેખાતી હતી પરંતુ ઈશાંતની યોજના અલગ હતી. લોર્ડ્સમાં, તેણે એલિસ્ટર કૂકના રૂપમાં પ્રથમ વિકેટ લીધી, ત્યારબાદ મોઈન અલી અને જો રૂટ વચ્ચેની ભાગીદારીને તોડીને ભારતને જીત તરફ દોરી ગયો હતો. આ મેચમાં ઈશાંતે 23 ઓવરમાં 7 વિકેટ ઝડપી હતી. તેને મેન ઓફ ધ મેચ પણ જાહેર કરવામાં આવ્યો હતો.

ઓગસ્ટ 2018માં જ્યારે ભારતીય ટીમ ઈંગ્લેન્ડના પ્રવાસે હતી. બર્મિંગહામ ટેસ્ટની પ્રથમ ઈનિંગમાં ઈશાંતે 17 ઓવરમાં માત્ર 1 વિકેટ ઝડપી હતી, પરંતુ બીજી ઈનિંગમાં અશ્વિન અને ઈશાંતે ઈંગ્લેન્ડની બેટિંગને તબાહ કરી નાખી હતી. અશ્વિને પ્રથમ ત્રણ વિકેટ લીધી અને ત્યારબાદ ઈશાંત શર્માએ 5 વિકેટ લઈને સ્પેલ પૂરો કર્યો. ઈશાંતે ડેવિડ મલાન, જોની બેરસ્ટો, બેન સ્ટોક્સ જેવા ખતરનાક બેટ્સમેનોને આઉટ કર્યા હતા.

આ પ્રકારના તમામ સમાચાર માટેે App ડાઉનલોડ કરો.